მინისტრმა დავით დარახველიძემ დღეს დევნილთა სამინისტროს სათათბირო საბჭოს რიგგარეშე სხდომა გამართა. სხდომაზე მიმდინარე საკითხები განიხილეს. ერთ-ერთი მნიშვნელოვანი საკითხი იყო დევნილთა განსახლების კრიტერიუმები, რომელზეც სამინისტრომ არასამთავრობო და საერთაშორისო ორგანიზაციების წარმომადგენლებთან ერთად იმუშავა.
დევნილებისთვის საცხოვრებელი ფართის განაწილების სახელმძღვანელო კრიტერიუმები ითვალისწინებს ქულების სისტემას, რომლის მიხედვითაც დევნილები საცხოვრებელ ფართს მიიღებენ. შეხვედრაზე, რომელსაც ესწრებოდნენ მინისტრის მოადგილეები, დეპარტამენტის უფროსები და ცალკეული სამმართველოს ხელმძღვანელები, აღნიშნული კრიტერიუმები დეტალურად განიხილეს. დოკუმენტის საბოლოო ვარიანტი კი სამინისტროსთან არსებულ სამეთვალყურეო საბჭოს წარედგინება.
დევნილთა სამინისტროს სათათბირო საბჭო არის ორგანო, რომელიც მიმიდინარე საკითხებს ოპერატიულად განიხილავს. საბჭოს წევრებმა დღეს ასევე განიხილეს დევნილებისთვის გადაცემული საცხოვრებელი ფართის დაკანონების პროცესის ოპერატიულად წარმართვასთან დაკავშირებული წინადადებები და იმსჯელეს კერძო სექტორში მცხოვრებ დევნილთ საკითხებისშემსწავლელი დროებითი კომისიის საქმიანობაზე.
სათათბირო საბჭო თვეში ერთხელ იკრიბება, თუმცა აუცილებლობის შემთხვევაში, შესაძლებელია სხდომა თვეში რამდენჯერმე შეიკრიბოს.
