თბილისის პედაგოგთა საკოორდინაციო ცენტრი, რომელიც ამ ეტაპზე სხვადასხვა სკოლის 150 პედაგოგს აერთიანებს, ერთის მხრივ მიესალმება პედაგოგთა შრომითი ანაზღაურების ოდენობის ზრდას, რადგან უკანასკნელ ოთ-ხუთ წელიწადში ეს არის მასწავლებლის საბაზო ხელფასის გაზრდის პირველი შემთხვევა, მაგრამ მეორეს მხრივ შეშფოთებას გამოთქვამს შემდეგ გარემოებათა გამო:
"შრომითი ანაზღაურების ოდენობა გაიზარდა მიზერულად - მხოლოდ 25%-თ; სახელფასო ზრდით, ცხადია, ცვლილება მოხდა ერთ მოსწავლეზე გათვლილი ვაუჩერული დაფინასების წესშიც, თუმცა გაურკვეველია ამ ცვლილებით რამდენად შესაძლებელი იქნება სასკოლო მენეჯმენტისა და ტექნიკური პერსონალის შრომითი ანაზღაურების ზრდა; პედაგოგიური საზოგადოებაში განსაკუთრებული უკმაყოფილება გამოიწვია ინფორმაციამ იმის შესახებ, რომ მიმდინარე წელს პედაგოგთა შრომითი ანაზღაურების ოდენობა აღარ გაიზრდება.
მიგვაჩნია, რომ მზარდი ინფლაციის პროცესში მთავრობის მიერ განხორციელებული ცვლილება არათუ ვერ შეცვლის და გააუმჯობესებს, არამედ უახლოეს თვეებში უფრო და უფრო გააუარესებს მასწავლებელთა ეკონომიკურ მდგომარეობას, თუმცა პრობლემა არ არის მარტო პედაგოგში, იგი უფრო გრძელვადიან პერსპექტივაში აისახება, რადგან ამთავითვე ეჭვქვეშ დგება განათლების ხარისხი და საერთოდ განათლების სამომავლო შედეგები.
ვფიქრობთ, რომ უკვე დასასრულს უახლოვდება პედაგოგთა მოთმინება ინერცია, და ენთუზიამი, რასაც აქამდე ეყრდნობოდა ქვეყნის საგანმანათლებლო სისტემა. ეს კი დაგვაყენებს ერთდროული საგანმანათლებლო-სოციალური კრიზისის საფრთხის წინაშე. სწორედ ზემოაღნიშნულ საფრთხეების თავიდან ასცილებლად მთავრობას რამდენჯერმე მივმართეთ და ვთხოვდით ფართომასშტაბიან შეხვედრას პედაგოგიურ საზოგადოებასთან, რადგან ჩვენთან დიალოგის რეჟიმში გადაწყვეტილიყო სხვადასხვა მნიშვნელოვანი, მათ შორის სახელფასო ანაზღაურების საკითხი. ჩვენ ვფიქრობთ, რომ პედაგოგებში არსებობდა და არსებობს ალტერნატიული ხედვები და გზები პრობლემის მოგვარებისა.
მდგომარეობის სირთულიდან გამომდინარე, გვინდა მოვუწოდოთ პედაგოგიურ საზოგადოებას, რომ ამ ეტაპზე თავი შეიკავონ ცალკეული არაორგანიზებული საპროტესტო ქმედებებისაგან, გვჯერა, რომ ჩვენ მიერ ნდობაგამოცხადებული დემოკრატიული მთავრობა სათანადოდ შეაფასებს არსებულ რეალობას და სამომავლო საფრთხეებსაც და რომ უახლოეს ხანში აუცილებლად გადადგამს მნიშვნელოვან ნაბიჯს პედაგოგებთან ფართომასშტაბიანი შეხვედრისთვის"- ნათქვამია თბილისის პედაგოგთა საკოორდინაციო ცენტრის განცხადებაში.