2013 წლის გამოსაშვები გამოცდები ორ ეტაპად ჩატარდება, _აღნიშნულის შესახებ ჟურნალისტებთან განათლების მინისიტრის მოადგილემ ალუდა გოგლიჩიძემ განაცხადა. ,,2012-2013 წლის სასკოლო გამოსაშვები გამოცდებთან დაკავშირებით ამოქმედდება მოდელი ,,4+4" და გამოცდები ორ ეტაპად ჩატარდება. 2013 წლის 15 თებერვლიდან-პირველი მარტის ჩათვლით გამოცდების პირველი ეტაპი ჩატარდება იმ ოთხ სასწავლი დისციპლინაში, რომელიც დასრულებულია, ეს არის გეოგრაფია და საბუნებისმეტყველო დისციპლინები, ხოლო 2013 წლის 20-მაისიდან-29-მაისის ჩათვლით ჩატარდება გამოცდების მეორე ეტაპი", _განაცხადა სამინისტროში გამართულ პრესკონფერენციაზე განათლების მინისტრის მოადგილემ ალუდა გოგლიჩიძემ და აღნიშნა, რომ პირველ ეტაპზე გასულ მოსწავლეებს, რომლებიც მინიმალურ სტანდარტს ვერ დაძლევენ საშუალება ექნებათ, რომ სასკოლო გამოცდები მეორე ეტაპზე მაისის თვეში ჩააბარონ. მისივე განცხადებით, კონკრეტულ საგანში გამოცდის ფორმის არჩევის და საგამოცდო განრიგის საკითხების შესახებ გადაწყვეტილებას თავად სკოლა იღებს. როგორც განათლების მინისტრის მოადგილემ განმარტა გამოცდის ჩაბარების უფლება ზოგადსაგანმანათლებლო დაწესებულების დამამთავრებელი კლასის მოსწავლეებსა და იმ პირებს აქვთ, რომლებმაც სრული ზოგადი განათლების საშუალო საფეხურის დაძლევის მიუხედავად, შესაბამის წელს სრული ზოგადი განათლების დამადასტურებელი დოკუმენტი ვერ მოიპოვეს. პირი, რომელმაც სრული ზოგადი განათლების საშუალო საფეხურის დაძლევის მიუხედავად ვერ/არ ჩააბარა გამოცდები, მხოლოდ იმ ზოგადსაგანმანათლებლო დაწესებულებაში რეგისტრირდება, რომელშიც სრული ზოგადი განათლების საშუალო საფეხური დაძლია. ასეთ პირს უფლება აქვს პირველ ეტაპზე ყველა (8) დამამთავრებელი გამოცდა ჩააბაროს. მოსწავლეებისა და ექსტერნების ინფორმირებასა და გამოცდებზე რეგისტრაციას სკოლა უზრუნველყოფს.
მასალის გამოყენების პირობები