ნიუ-იორკში რუსეთის მოქალაქე ნიკიტა კუზმინი დააკავეს, რომელმაც 2005 წელს, სხვა ორ ჰაკერთან ერთად, კომპიუტერული ვირუსის დახმარებით, სხვისი კომპიუტერები დააზიანა. მანჰეტენის ფედერალურმა პროკურატურამ დღეს ამ რეზონანსული საქმის დოკუმენტები საჯარო გახადა.
25 წლის მოსკოველი კუზმინის საქმეში, 27 წლის ლატვიელი, დენის კალოვსკისი, ნიკნეიმით, მაიამი და 28 წლის რუმინელი, მიხაი პაუნესკუ, ჰაკერულ წრეებში ცნობილი ნიკნეიმით, ვირუსი, ფიგურირებენ. სამივე მათგანს ბრალად ედება, დანაშაულებრივი მიზნით თაღლითობა და სხვისი კომპიუტერების გატეხვა, სადაც ტროიანის ვირუსი, სახელწოდებით Gozi შეუშვეს. პროკურორის თქმით, მავნე პროგრამა ისტორიაში ერთ-ერთი ყველაზე საშიში ვირუსია. საერთო ჯამში, ტროიანმა 1 მილიონზე მეტი კომპიუტერი დააზიანა. აშშ-ში მწყობრიდან 40 ათასი კომპიუტერი გამოვიდა, რომელთაგან 190 „ნასას" ეკუთვნოდა.
წარდგენილი ბრალდების თანახმად, ჰაკერების მიერ მიყენებული ზარალი ათეულ მილიონობით დოლარია, რის გამოც კიბერდამნაშავებს საკმაოდ მაღალი სასჯელი ელით. ამის შესახებ ინფორმაციას „ბი-ბი-სი" ავრცელებს. მაგალითად, მაქსიმალური სასჯელი კუზმინს ელოდება, რომელიც ლიდერად და მავნე პროგრამის მთავარ შემქმნელად ითვლება, ეს სასჯელი კი 95 წელს შეადგენს, ლატვიელ კალოვსკისს - 76 პატიმრობა ელის, ხოლო რუმინელ პაუნესკუს - 60 წლიანი. ამათგან ამერიკაში მხოლოდ კუზმინი იმყოფება, დანარჩენების ექსტრადირება კი ჯერ არ მომხდარა.