ცნობილი რუსი ლამაზმანი - ანა ლიტვინოვა, ვერ გაუმკლავდა მძიმე დაავადებას, რომელიც მოდელის გარუჯვისადმი სიყვარულმა გამოიწვია. ექიმები მიიჩნევენ, რომ კანის მძიმე დაავადება, რომელიც 31 წლის ლიტვინოვას დაემართა, ულტრაიისფერი სხივების ორგანიზმზე ნეგატიური გავლენის შედეგი იყო. ანა გერმანულ კლინიკაში, მელანომისგან გარდაიცვალა, რომლის განკურნებაც საუკეთესო ევროპელმა სპეციალისტებმაც ვერ შეძლეს.
მოდელის ახლობლები „მის რუსეთის" და „მის სამყაროს" მონაწილის ეგზოტიკური ქვეყნებისა და გარუჯვისადმი დიდ სიყვარულზე საუბრობენ. მათი თქმით, გოგონას ძალიან უყვარდა მზე, პლაჟები და ოქროსფერი რუჯი. ანა, ასევე, ხშირად სარგებლობდა სილამაზის მრავალრიცხოვანი სალონების სოლარიუმებით. ლამაზმანისათვის ფატალური დაავადების აღმოჩენა მოულოდნელობა იყო. ექიმებმა, ერთ-ერთი გეგმიური სამედიცინო შემოწმების დროს, გოგონას საშინელი დიაგნოზი დაუსვეს. სამწუხაროდ, დაავადება უკვე ძალიან შორის იყო წასული.
ანას ძმის, ნიკიტას განცხადებით, ახლა ოჯახის წევრები და ახლობლები ცდილობენ, როგორმე მწუხარება შეუმსუბუქონ ანას დედას, რომელსაც უსაზღვროდ უყვარდა ქალიშვილი. ნიკიტა ასევე ყვება, რომ მათ ყველა შესაძლებლობა გამოიყენეს, რათა გოგონა სიკვდილს გადაერჩინათ. მკურნალობდნენ მსოფლიოს საუკეთესო კლინიკებში, საუკეთესო სპეციალისტებთან. უკანასკნელი ნახევარი წლის განმავლობაში, ანა მთლიანად ძლიერმომქმედი, თანამედროვე ამერიკული პრეპარატებით ცხოვრობდა, თუმცა, შემდეგ ამ პრეპარატებს მისი ორგანიზმი შეეგუა და ავადმყოფობა სასიკვდილო აღმოჩნდა.
მედიკოსები მელანომას ერთ-ერთ ყველაზე საშიშ და იშვიათ დაავადებად მიიჩნევენ, კანის კიბოს შორის და მას „კიბოს დედოფალსაც" კი უწოდებენ. სპეციალისტების განცხადებით, ამ დაავადებისადმი განსაკუთრებით მიდრეკილნი ღია ფერის, ხალებიანი კანის მქონე ადამიანები არიან. თუ მელანომამ განვითარება დაიწყო, მისი განკურნება შეუძლებელია. სამწუხაროდ, მსოფლიოს ვერცერთმა ქვეყანამ ჯერ კიდევ ვერ შექმნა ისეთი პრეპარატი, რომელიც ამ დაავადებას გაუმკლავდება. მელანომის შემთხვევაში, ქიმიოთერაპიაც კი უძლურია. ამ აგრესიული და საშიში დაავადების დიაგნოზს, 100 ათასიდან 4 ადამიანს უსვამენ.
ანა ლიტვინოვას მოსკოვში, ეკლესიაში დაკრძალავენ. ლიტვინოვას დედა, ძმა და ახლობლები ჯერ კიდევ ვერ იჯერებენ, რომ ანა ცოცხალი აღარ არის. მოდელის ერთ-ერთი მეგობრის განცხადებით, ანია ყოველთვის ცდილობდა, მოდას არ ჩამორჩენოდა, დადიოდა სოლარიუმებში, ეგზოტიკურ ქვეყნებში, სადაც ბევრი მზეა. მას სთხოვდნენ, რომ სოლარიუმებით ნაკლებად ესარგებლა, თუმცა, ყველა ადამიანს ჰგონია, რომ ზუსტად ეს მას არ დაემართება - აცხადებს მეგობარი. ახლობლები იხსენებენ, რომ ანა ლიტვინოვა ძალიან კეთილი და საყვარელი ადამიანი იყო...