მოსკოვში სტუმრად მყოფი საქართველოს პატრიარქი იმედოვნებს, რომ ახლო მომავალში მოხდება იმ რთული საკითხების გადაწყვეტა, რომელიც საქართველოსა და რუსეთს შორის არსებობს. „ის ურთიერთობა, რომელიც არსებობდა უკანასკნელ წლებში, სასურველია უკეთესი ყოფილიყო. მხედველობაში გვაქვს, მაგალითად, ღია სავიზო რეჟიმი, რომელიც მოქმედებს თურქეთთან, ირანთან, მაგრამ იგივე მდგომარეობა არ არის რუსეთთან. ეს ჩვენს ურთიერთობებში სიძნელეებს ქმნის. ვფიქრობ, ეს საკითხი უნდა გადაწყდეს", - ციტირებს რუსული მედია უწმინდესის ნათქვამს. ეს განცხადება ილია მეორემ რუსეთის პატრიარქთან, კირილთან შეხვედრისას, მოსკოვში გააკეთა.
„რია ნოვოსტის" ცნობით, საქართველოს პატრიარქი მიიჩნევს, რომ ორ ქვეყანას შორის ურთიერთობაში ერთ-ერთი ძირითადი პრობლემა აფხაზეთის და ცხინვალის რეგიონის საკითხია, რომელიც მთავარი მიზეზია დღეს ორ სახელმწიფოს შორის არსებული სიძნელეებისა.
„მე ვესაუბრე რუსეთის სახელმწიფო მოღვაწეებს და ვუთხარი, რომ რუსეთს სჭირდება ერთიანი საქართველო, ხოლო საქართველოს ძლიერი რუსეთი. ჩვენ გვჭირდება ერთმანეთი, ამიტომ ეს საკითხი ადრე თუ გვიან უნდა გადაწყდეს და რაც უფრო მალე იქნება მოგვარებული, მით უკეთესია არა მხოლოდ რუსეთისა და საქართველოსთვის, არამედ, აფხაზეთისა და ცხინვალის რეგიონისთვისაც" - აღნიშნა ილია მეორემ. თავის მხრივ, პატრიარქმა კირილმა იმედი გამოთქვა, რომ საქართველოს და რუსეთის ეკლესიები გადალახავენ იმ პრობლემებს, რომელიც აფხაზეთსა და ცხინვალში მოძღვრებთან დაკავშირებით წარმოიშვა.
საქართველოს კათალიკოს-პატრიარქი, ილია მეორე მოსკოვში გუშინ ჩავიდა. ვიზიტის ოფიციალური მიზეზი მართლმადიდებელი ხალხების ერთობის საერთაშორისო ფონდის მიერ საქართველოს ეკლესიის პრემიით დაჯილდოვება გახდა, თუმცა, როგორც რუსული მედია წერს, ვარაუდოებენ, რომ ილია მეორის ეს ვიზიტი მნიშვნელოვანი ნაბიჯი იქნება ორ ქვეყანას შორის სამომავლო ურთიერთობის ნორმალიზაციისათვის.
