საქართველოს განათლებისა და მეცნიერების მინისტრის მოადგილემ ალუდა გოგლიჩიძემ პირველი სამუშაო შეხვედრა ვანის მუნიციპალიტეტში გამართა, სადაც საჯარო სკოლების დირექტორებს, პედაგოგებს, საგანმანათლებლო რესურსცენტრის თანამშრომლებს და მშობლებს შეხვდა.
შეხვედრის მთავარი თემა რაიონის სკოლებში არსებული მდგომარეობის გაცნობა და იმ სიახლეებზე საუბარი იყო, რაც ზოგადი განათლების მიმართულებით ბოლო პერიოდში განხორციელდა და მომავალშია დაგეგმილი. ალუდა გოგლიჩიძის განცხადებით, სამინისტროს მთავარი პრიორიტეტი სწავლა-სწავლების ხარისხის ამაღლებაა, რომელსაც ზოგად განათლებაში მიმდინარე რეფორმები ითვალისწინებს.
სამუშაო შეხვედრაზე საუბარი საგნობრივი კათედრების, სასკოლო ბიბლიოთეკების, სამეურვეო საბჭოების მუშაობას, მომავალ საატესტატო გამოცდებს და სხვა მნიშვნელოვან თემებს შეეხო.
შეხვედრა კითხვა-პასუხის რეჟიმში წარიმართა. მონაწილეებს საშუალება ჰქონდათ ყველა კითხვაზე პასუხი უშუალოდ მინისტრის მოადგილისგან მიეღოთ.