იუსტიციის სამინისტროს ეროვნული არქივში 2012 წელს დოკუმენტების დიგიტალიზაციის პროექტები აქტიურად მიმდინარეობდა. წლის განმავლობაში ციფრულ მატარებელზე გადაიტანეს წერილობითი დოკუმენტების 830 000 გვერდი, 2 247 ტექნიკური ნახაზი, 7 980 ფოტოს პოზიტივი და ნეგატივი, 300-ზე მეტი ფონოჩანაწერი.
კინოფოტოდოკუმენტების ცენტრალურმა არქივმა 2012 წელს მინის ფოტონეგატივის დასკანერებისათვის სპეციალური აპარატურა შეიძინა და 2 380 ნეგატივი, რომელიც მანამდე გაუშიფრავი იყო, დასკანერდა. ამავე არქივში 297 მხატვრული და 17 მულტიპლიკაციური ფილმის ფონოჩანაწერები მაგნიტური ფირებიდან ციფრულ ფორმატში გადაიტანეს.
საისტორიო ცენტრალურ არქივში XI-XIX საუკუნეების დოკუმენტების 80 000-მდე გვერდია გაციფრულებული. დიგიტალიზაციის პროცესი განხორციელდა უკონტაქტო სკანერით, რაც უზრუნველყოფს საუკუნეების წინანდელი დოკუმენტების მაქსიმალურად უსაფრთხო გადაღებასა და დაზიანებისგან დაცვას. სპეციალური ფოტოობიექტივი და განათება, რომლითაც აღჭურვილია უკონტაქტო სკანერი, დოკუმენტის უმცირეს დეტალსაც კი მაღალი ხარისხით აღბეჭდავს.
გასულ წელს უახლესი ისტორიის ცენტრალური არქივის დოკუმენტების 750 000-მდე გვერდი დასკანერდა და სპეციალურ ელექტრონულ პროგრამაში განთავსდა. აღსანიშნავია, რომ უახლესი ისტორიის ცენტრალური არქივის ტექნიკური განყოფილებაში დაცული შენობა-ნაგებობების დიდფორმატიანი ნახაზების დიგიტალიზაციისათვის 2012 წელს შეძენილი იყო სპეციალური სკანერი და ამ დროისათვის დასკანერებულია 2 247 ნახაზი.
დოკუმენტების დიგიტალიზაციის პროექტები, ერთი მხრივ, მიმართულია დოკუმენტების დაცვისაკენ, რათა არ მოხდეს მათი დედნების ხშირი გამოყენება, ხოლო, მეორე მხრივ, ზრდის მკვლევართათვის დოკუმენტების ხელმისაწვდომობას.