დევნილთა მინისტრმა დავით დარახველიძემ მოსკოვის პროსპექტზე მდებარე ერთ-ერთი შენობა დაათვალიერა, რომელსაც დევნილი მოსახლეობისთვის რეაბილიტაცია უტარდება. აღნიშნულ შენობაში ე.წ. „არაშენდიდან" გამოსახლებული დევნილები შესახლდებიან (ეს ის დევნილები არიან, რომლებიც შემდეგ ბაქოს ქუჩა #1 თვითნებურად დაიკავეს). აღნიშნული ოჯახები დათანხმდნენ სამინისტროს წინადადებას, საკუთარი სურვილით დატოვეს თვითნებურად დაკავებული ბაქოს ქუჩა #1. შესაბამისად, მათი ძალით გამოსახლება არ გახდა საჭირო. აღნიშნულ ოჯახებს სამინისტრომ პირობა მისცა, რომ 2 თვეში ახალ ბინებში გადაიყვანდნენ.
მინისტრმა სარემონტო სამუშაოები დევნილ მოსახლეობასთან ერთად დაათვალიერა, რომ რეაბილიტაციისას აღნიშნულ ობიექტში შესასახლებელ დევნილთა ინტერესების გათვალისწინება მოხდეს. როგორც დევნილებმა აღნიშნეს, პირველი შემთხვევაა, როცა თვითნებურად დაკავებული ობიექტიდან მათი გამოსახლეობა არ გახდა საჭირო; როცა დევნილებსა და სამინისტროს შორის პრობლემები დიალოგის რეჟიმში წყდება; როცა სამინისტრო პირობას ასრულებს; როცა რეაბილიტაციისას დევნილთა ინტერესები გათვალისწინებულია და დევნილებსა და სამინისტროს შორის ნდობა აღდგენილია.