ბაგრატი უნდა ამოირიცხოს იუნესკოს სიიდან და ხელმეორედ ჩაირიცხოს ადეკვატური შინაარსით, - აცხადებს გაზეთ "ქრონიკასთან" ინტერვიუში
მისი თქმით, ბაგრატის ტაძარი იყო ნანგრევი და ასე იყო შესული იუნესკოს სიაში. რადგან აღდგენილია, ის აღარ არის ნანგრევი და, შესაბამისად, ის ვეღარ იქნება ამ ფორმით. უნდა მოხდეს მოდიფიცირება. მის მიმართ სხვა კრიტერიუმები უნდა ამოქმედდეს ამავე ნომინაციაში. რადგან ნანგრევი აღარ არის, მაშინ ის უნდა ამოირიცხოს და ხელმეორედ უნდა ჩაირიცხოს უკვე სხვა, ადეკვატური შინაარსით.
"ეს ყველაფერი 90-იან წლებში, ასე ვთქვათ, დაჩქარებული წესით მოხდა. ამას ასე არ ამბობენ, მაგრამ რეალურად ასე იყო. იუნესკოს სიაში საბჭოთა კავშირიდან არც ერთი ძეგლი არ იყო. მისი დაშლის შემდეგ ყველა ქვეყანაში ჩავიდნენ მისიები, და შერჩევით მიანიჭეს ყველგან სტატუსი. ამ სიაში ბაგრატი და გელათი ერთად, ერთ ნომინაციაში მოხვდა. აქ იყო უკვე ნაღმი ჩადებული, როცა ესენი ერთ ნომინაციაში გავიდნენ. იმ დროისთვის, ეს ლოგიკური იყო, მაგრამ ეს შეიცავდა რისკებს. ნომინაციას დაახლოებით ასეთი დეფინიცია აქვს - შუა საუკუნეების ქართული არქიტექტურის შედევრები, რომელიც აჩვენებს იმ ეპოქის წამყვან მხატვრულ და ისტორიულ პროცესებს. გელათი არის სრულად შემორჩენილი და ის ააშენა დავით აღმაშენებელმა და ბაგრატი იყო დიდ წილად, მეოცე საუკუნეში აშენებული. თუ შეადარებთ ნანგრევს, როცა ის ნამდვილი ნანგრევი იყო, მეოცე საუკუნის დასაწყისში და როცა ის შევიდა 1994 წელს იუნესკოს ნუსხაში, ეს არის ახალი რანდევუ. და ეს ახალი რანდევუ არის შუა გზაში - არც აქეთ არის და არც იქით. ბუნებრივია, ქვეყანა ოდნავ მომძლავრდებოდა თუ არა, დგებოდა საკითხი რომ უნდა აღდგეს ბაგრატის ტაძარი. აღდგა ტაძარი და ბუნებრივია, რომ აღარ არის თეორია და პრაქტიკა ერთმანეთის ადეკვატური. Aამიტომ, ახლა საუბარია, რომ დაზუსტდეს საზღვრები. იუნესკოშიც არ არიან კატეგორიულები. ისინიც ხედავენ ჩვენი თვალით და ამბობენ, რომ მოდი გავაკეთოთ საზღვრების მოდიფიცირება და ვნახოთ რა გამოვა", - აცხადებს ვაჩეიშვილი და აღნიშნავს, რომ ბაგრატის ნუსხიდან ამოღება იმიტომ არ ხდება რომ ის ცუდი რესტავრაციაა.
"ყველა საკათედრო ტაძარი არის აღდგენილი მსოფლიოში, ყველა!. რეკონსტრუირებული ძეგლებით სავსეა იუნესკოს ნუსხა - წმინდა სოფიას ტაძარი, კიევ-პეჩორის ლავრა, მოსტარის ძველი ხიდი და სხვა უამრავი. სამწუხაროდ, ბაგრატის ტაძრის საკითხი იქცა პოლიტიკურ თემად, თორემ უფრო ნაკლები იქნებოდა ვნებათაღელვა. ამორიცხვა არ ხდება იმიტომ, რომ ის არის ცუდი. ის ძალიან კარგია. ეს არის მართლა დიდი პროდუქტი, ეს არის ახალი სიტყვა. სხვათა შორის, ასე ამბობენ ხოლმე - აი, გელათი რა კარგია და ბაგრატი რა ცუდი. გელათიც რომ ჩვენი გაკეთებულია? გელათიც რომ ქართულმა სარესტავრაციო სკოლამ გააკეთა? გელათსაც რომ ჩვენ ვკურირებთ? გელათის ხარისხიც რომ ჩვენია? ესეც გაიხსენონ ოპონენტებმა!", - აცხადებს "ქრონიკასთან" საუბარში ვაჩეიშვილი.