კობი-გუდაურის მონაკვეთზე არსებული გვირაბების შესასვლელ-გასასვლელები ჩამოწოლილი 5-6 მეტრიანი ზვავებისაგან გაიწმინდა და გზის აღნიშნულ მონაკვეთზე გადაადგილება ნებისმიერი სახის სატრანსპორტო საშუალებისათვის შესაძლებელია.
აღნიშნულ მონაკვეთზე თოვლის საფარის გაწმენდით სამუშაოებში დღეს რეგიონული განვითარებისა და ინფრასტრუქტურის მინისტრის მოადგილემ შოთა მურღულიამ მიიღო მონაწილეობა. იგი პირადად ესწრებოდა გზის გაწმენდით სამუშაოებს და ეხმარებოდა საქართველოს საავტომობილო გზების დეპარტამენტის თანამშრომლებს აღნიშნული მონაკვეთის თოვლისგან გასუფთავებაში.
მინისტრის მოადგილის განცხადებით, საქართველოს საავტომობილო გზების დეპარტამენტის ოპერატიულობის შედეგია, რომ მიუხედავად უხვი ნალექისა, კობი-გუდაურის, ასევე ცენტრალური მაგისტრალის და რაიონულ ცენტრებთან დამაკავშირებული მონაკვეთები ხანგრძლივად არ ჩაკეტილა და მოძრაობის შეფერხება მინიმუმამდე იყო დაყვანილი.
ვიდრე ბუნებრივი პირობების გამო, გზის გაწმენდის სამუშაოები დაიწყებოდა რეგიონული განვითარებისა და ინფრასტრუქტურის სამინისტრომ, შინაგან საქმეთა და თავდაცვის სამინისტროების დახმარებით ყაზბეგის რაიონში ჩარჩენილი ქალების და ბავშვების ტრანსპორტირება ვერტმფრენით მოახდინა. მათივე დახმარებით მოხერხდა ზვავში მოყოლილი რუსი მთასვლელების დედაქალაქში დროულად გადმოსვენებაც.
ამჟამად მცხეთა-სტეფანწმინდა-ლარსის საავტომობილო გზის გუდაური-ლარსის მონაკვეთზე მაღალი გამავლობის ტრანსპორტისთვის მოძრაობა თავისუფალია. გადაადგილება შეზღუდულია მისაბმელიანი, ნახევრადმისაბმელიანი ავტოტრანსპორტისა და 30 ადგილზე მეტი ტევადობის ავტობუსებისათვის.დანარჩენი სახის ავტროტრანსპორტისთვის მოძრაობა დასაშვებია მოცურების საწინააღმდეგო ჯაჭვებით.
აღნიშნული რეჟიმით მოძრაობა განხორციელდება საპატრულო პოლიციის უშუალო ზედამხედველობით და კოორდინაციით.
