საქართველოს იძულებით გადაადგილებულ პირთა, განსახლებისა და ლტოლვილთა მინისტრის მოადგილე მამუკა ცოტნიაშვილი ქუთაისში, ნიკეას ქუჩაზე, ყოფილი 19-ე ბაგა ბაღის შენობაში მცხოვრებ აფხაზეთიდან დევნილ მოსახლეობას შეხვდა. ცოტნიაშვილმა დევნილებს სამინისტროს 2013 წლის სტრატეგია და ძირითადი მიმართულებები გააცნო და მათი საჭიროებებიც მოისმინა.
ცოტნიაშვილმა დევნილებს შობა-ახალი წელიც მიულოცა და მომხმარებელთა ფედერაციის ხელმძღვანელთან ერთად სადისტრიბუციო კომპანია „მეგაკოსა" და კომპანია „ონიმას" სასაჩუქრე პაკეტები - ტკბილეულობა და ძეხვეულობა გადასცა.
აღნიშნულ შენობაში აფხაზეთიდან დევნილი 23 ოჯახი ცხოვრობს. შენობა რეაბილიტირებული და დაკანონებულია. როგორც დევნილებმა სამინისტროს წარმომადგენლებთან საუბრისას აღნიშნეს, მსგავსი შეხვედრები ინტენსიურად უნდა ხდებოდეს, რომ ურთიერთობა გამჭვირვალე იყოს. "მისასალმებელია, რომ სამინისტროს ახალი ხელმძღვანელობა დევნილ მოსახლეობას გვხვდება. იმერეთში რამდენჯერმე იყვნენ ჩამოსულები და მათთან შეხვედრის საშუალება მოგვეცა. ურთიერთობა გაიხსნა და იმედი გვაქვს, ასე გაგრძელდება. საახალწლო საჩუქრებმა კი ასევე გაგვხარა, რადგან წლის მანძილზე ასე ხელდამშვენებული ჩვენთან არავინ მოსულა" - აღნიშნა აფხაზეთიდან დევნილმა ვახტანგ ქობალიამ.
მამუკა ცოტნიაშვილიმა კი დევნილებს პირობა მისცა, რომ მსგავსი შეხვედრები ინტერნსიურად გაგრძელდება: "მზად ვართ ღია, გამჭვირვალე და გახსნილი ურთიერთობებისთვის. სწორედ ამიტომ, როგორც თბილისში ისე რეგიონებში დევნილ მოსახლეობას ყოველდღიურ რეჟიმში ვხვდებით. შესაბამისად ვმუშაობთ, პრობლემა ნაკლები იყოს და დევნილთა საჭიროებები მინიმალურ ვადებში მოგვარდეს."