,,ფასდაუდებელია ჯემალ აჯიაშვილის წვლილი, ქართველი და ებრაელი ერის კულტურული ურთიერთობის საქმეში", - განაცხადა პრემიერ-მინისტრმა ბიძინა ივანიშვილმა მწერალ ჯემალ აჯიაშვილის გარდაცვალების კომენტირებისას.
ბიძინა ივანიშვილმა საქართველოს მწერალთა სახლში ჯემალ აჯიაშვილის ხსოვნისადმი გახსნილ სამძიმრის წიგნში სამახსოვრო ჩანაწერიც დატოვა და აღნიშნა, რომ აჯიაშვილის სახით ქართულმა და ებრაულმა პოეზიამ დიდი პიროვნება დაკარგა.
"მწუხარებას გამოვთქვამ დიდი მწერლის ჯემალ აჯიაშვილის გარდაცვალების გამო. ფასდაუდებელია ის წვლილი, რომელიც ჯემალ აჯიაშვილმა შეიტანა ქართველი და ებრაელი ერის კულტურული ურთიერთობის საქმეში. მთელი თავისი მოღვაწეობა მან ამ ორი უძველესი ერის დაახლოებას მიუძღვნა. ებრაული კლასიკური პოეზიის თარგმანებით მან დიდი საგანძური შეიტანა ქართულ პოეზიაში", _ განაცხადა ივანიშვილმა.
შეგახსენებთ, რომ ისრაელში, 5 იანვარს, 68 წლის ასაკში გამოჩენილი ქართველი ებრაელი პოეტი და საზოგადო მოღვაწე ჯემალ აჯიაშვილი გარდაიცვალა.
ჯემალ აჯიაშვილი დაიბადა 1944 წლის 23 მარტს დაბა სენაკში, საქართველო. 1967 წელს დაამთავრა თბილისის სახელმწიფო უნივერსიტეტის აღმოსავლეთმცოდნეობის ფაკულტეტი. 1968-1971 წლებში სამსახურეობრივი მივლინებით იმყოფებოდა ირანში.
1974-1990 წლებში მუშაობდა საქართველოს მწერალთა კავშირთან არსებული მხატვრული თარგმანისა და ლიტერატურული ურთიერთკავშირების მთავარ სარედაქციო კოლეგიაში უფროს სამეცნიერო რედაქტორად. კითხულობდა ლექციებს თბილისის სახელმწიფო უნივერსიტეტში და უცხო ენების ინსტიტუტში. 1988 წლიდან არის თბილისის სახელმწიფო უნივერსიტეტის ქართულ-უცხოური ლიტერატურული ურთიერთობების სამეცნიერო-კვლევითი ლაბორატორიის თანამშრომელი. 1993 წელს არჩეულ იქნა სულხან საბა ორბელიანის სახელობის სახელმწიფო პედაგოგიური ინსტიტუტის აღმოსავლეთმცოდნეობის კათედრის გამგედ, 1997 წლიდან კი არის ებრაული სახალხო უნივერსიტეტის რექტორი. ჯემალ აჯიაშვილი არის საქართველოს თეატრალურ მოღვაწეთა კავშირის წევრი 1977 წლიდან, ხოლო საქართველოს მწერალთა კავშირის წევრი - 1980 წლიდან.
შემოქმედება. ჯემალ აჯიაშვილმა თარგმნა მსოფლიო კლასიკური პოეზიის ნიმუშები: ბიბლიური ფსალმუნები, ანდალუსიელი ებრაელი პოეტების ლექსები, ძველბერძნული და სპარსული პოეზიის ნიმუშები, შექსპირის, ჩიკამაცუს, ტირსო დე მოლინას, კარლო გოცის დრამატული პოემები, დანტეს, პეტრარკას, მიქელანჯელოს, რილკეს სონეტები, ვლადიმერ მაიაკოვსკის, ბორის პასტერნაკის და სხვათა ლექსები.
კ.მარჯანიშვილის სახ. დრამატულ თეატრში წარმატებით დაიდგა ჯ. აჯიაშვილის მიერ ნათარგმნი კარლო გოცის პოემა-ზღაპარი "ცისფერი უკუნეთი", ჩიკამაცუს დრამატული პოემა "შეყვარებულთა თვითმკვლელობა კუნძულის ზეციურ ბაგეზე".
ჯ.აჯიაშვილმა ქართველთა და ებრაელთა ურთიერთობას უძღვნა ისტორიული ესე "გაიღვიძე ქნარო!" - პიესა-მონოლოგი, რომელიც კ.მახარაძემ დადგა ერთი მსახიობის თეატრში.