კომპანია "თელასმა" სათნოების სახლის "კათარზისის" მობინადრეებს შობის ბრწყინვალე დღესასწაული და ახალი წელი მიულოცა.
ტრადიციული „სუპერ ბებია და სუპერ ბაბუა" კონკურსის მონაწილეებისთვის კომპანიამ ფულადი ჯილდოები დააწესა. გამარჯვებულები 300 ლარით დაჯილდოვდნენ, ხოლო დანარჩენი მონაწილეები - 50 ლარით. აგრეთვე, საახალწლო ნობათი - სხვადასხვა ტკბილეული, "თელასისგან" ყველა კონკურსანტმა მიიღო.
წელს კონკურსში 70 წელს გადაცილებული 26 მოხუცი მონაწილეობდა - "კათარზისის" და საქართველოს სხვა რეგიონებში განლაგებული სათნოების სახლების წარმომადგენლები. „სუპერ ბებიის" და „სუპერ ბაბუის" საპატიო წოდება მიენიჭათ „კათარზისის" მობინადრეებს: 86 წლის ციალა კიკილაშვილს და 83 წლის გიორგი აგლაძეს.
ჯილდოები კონკურსში გამარჯვებულებს სს „თელასის" საზოგადოებასთან ურთიერთობის დეპარტამენტის უფროსმა ვალერი ფანცულაიამ გადასცა. საღამოს უძღვებოდა მსახიობი ნანული სარაჯიშვილი. ჟიურის შემადგენლობაში შედიოდნენ დუეტი „ჯორჯია" და ფოტოგრაფი ირმა შარიქაძე.
სათნოების სახლ "კათარზისს" კომპანია "თელასი" 2005 წლიდან მფარვებლობს. საქველმოქმედო პროგრამის ფარგლებში "თელასი" მოხუცთა თავშესაფარს ზამთრის პერიოდში მოხმარებული ელექტროენერგიის საფასურს უფარავდა და მიუსაფარ მოხუცებს პროდუქტით ამარაგებდა. დახმარების ტრადიციული პროგრამის გარდა კომპანია სათნოების სახლს საჭირო ინვენტარითაც სისტემატურად ეხმარებოდა.