10-14 იანვარს საქართველოს ყველა მართლმადიდებელი ეკლესიის წარმომადგენელი ესტუმრება.
საპატრიარქოს ინფორმაციით,, სრულიად საქართველოს კათოლოკოს-პატრიარქის, უწმინდესისა და უნეტარესის, ილია მეორის აღსაყდრებიდან 35-ე და დაბადებიდან 80-ე წლისთავთან დაკავშირებით საიუბილეო ღონისძიებებში მონაწილეობისთვის სხვადასხვა მართლმადიდებელი ეკლესიის წარმომადგენლები 10 იანვარს ჩამობრძანდებიან.
სტუმრებს შორის იქნება მსოფლიო პატრიარქი ბართლომეოს პირველი. დელეგაციებში შემავალი სასულიერო პირების ვინაობა მოგვიანებით დაზუსტდება.
საიუბილეო პროგრამის მიხედვით, 11 იანვარს, წმ. ანდრია პირველწოდებულის სახელობის ქართულ უნივერსიტეტში სამეცნიერო კონფერენცია გაიხსნება. დღის ბოლოს ფილარმონიის დიდ საკონცერტო დარბაზში სრულიად საქართველოს კათოლოკოს-პატრიარქის, უწმინდესისა და უნეტარესის, ილია მეორის აღსაყდრებიდან 35-ე და დაბადებიდან 80-ე წლისთავთან დაკავშირებით საზეიმო კონცერტი გაიმართება.
12 იანვარს საპატიო სტუმრები დავით გარეჯის ან შიომღვიმის მონასტრებს მოილოცავენ. ასევე, სამების საკათედრო ტაძარში ლოცვა გაიმართება.
13 იანვარს კი, კათოლიკოს-პატრიარქი საზეიმო წირვას სამების საკათედრო ტაძარში სხვადასხვა მართლმადიდებელი ეკლესიის წარმომადგენლებთან ერთად აღავლენს.
სასულიერო პირები თბილისს 14 იანვარს დატოვებენ.
