ისრაელის ელჩმა საქართველოში იუვალ ფუქსმა სრულიად საქართველოს კათოლიკოს-პატრიარქს, უწმინდესსა და უნეტარესს, ილია მეორეს იუბილე მიულოცა. იუვალ ფუქსმა პატრიარქს იუბილე იერუსალიმიდან მიულოცა.
"ისრაელის ელჩმა იუვალ ფუქსმა იერუსალიმის წმინდა მიწიდან საპატრიარქოში დარეკა და სრულიად საქართველოს პატრიარქს, ილია მეორეს იუბილე მიულოცა. ისრაელის მოსახლეობა სიამოვნებით იხსენებს პატრიარქის ვიზიტს წმინდა მიწაზე და აფასებს მის მეგობრობას ისრაელის სახელმწიფოსთან და ებრაელ ერთან. ისრაელისთვის ხალხებსა და რელიგიებს შორის მეგობრობა უაღრესად მნიშვნელოვანია", - აღნიშნულია საელჩოს ინფორმაციაში.
საელჩოს განცხადებით, ისრაელის საელჩო საქართველოში არასდროს დაიშურებს ძალებს იმ პრაქტიკული საკითხების გადასაჭრელად, რომლებიც ქართველი პილიგრიმების ჯგუფებს წმინდა მიწაზე სტუმრობას გაუადვილებს. "ჩვენთვის ამ ვიზიტებს უაღრესად დიდი მნიშვნელობა აქვს. დამდეგ დღესასწაულებზე ბატონი იუვალ ფუქსი საქართველოს პატრიარქს ჯანმრთელობას, ბედნიერებას, მშვიდობას და ყოველივე საუკეთესოს უსურვებს", - აღნიშნულია განცხადებაში.
საქართველოს კათოლიკოს-პატრიარქს 4 იანვარს 80 წელი შეუსრულდა.