საქართველოს პრემიერ-მინისტრმა ავღანეთში დაღუპული სერჟანტის, გიორგი კიკაძის ოჯახს მიუსამძიმრა.
"ამ კაცმა თავი სამშობლოს შესწირა. თუმცა, საერთაშორისო თანამეგობრობის ძალებთან ერთად, ის იცავდა არა მხოლოდ თავის სამშობლოს, არამედ - უცხო ქვეყნის უსაფრთხოებასაც, რითაც ძალიან დიდ იმიჯს უქმნიდა ჩვენს სამშობლოს. ეს არის მთელი საქართველოსთვის დიდი დანაკლისი. მოვედი, რომ სამძიმარი გამოვუცხადო მის ოჯახს. უნდა მოვახერხოთ, რომ მაქსიმალურად უსაფრთხო გახდეს ჩვენი ჯარისკაცების სამსახური, როგორც ქვეყნის შიგნით, ისე - გარეთ, - განაცხადა ბიძინა ივანიშვილმა.
ავღანეთში დაღუპულ სერჟანტ გიორგი კიკაძეს დღეს რუსთავში დაკრძალეს. დაკრძალვას თავდაცვის სამინისტროს წარმომადგენლები და სხვა ოფიციალური პირები დაესწრნენ. სერჟანტ გიორგი კიკაძის ცხედარი საქართველოში 2 იანვარს ჩამოასვენეს.
სერჟანტი გიორგი კიკაძე 19 დეკემბერს ავღანეთში გაუჩინარდა. თავდაცვის სამინისტრომ და გაერთიანებულმა შტაბმა სპეციალური ჯგუფი შექმნა, ბრიგადის გენერლის ვახტანგ კაპანაძის მეთაურობით. 10 დღის განმავლობაში მიმდინარეობდა ძიება-გადარჩენის ოპერაცია. თუმცა, 29 დეკემბერს სამხედრო მოსამსახურე გარდაცვლილი იპოვეს.
სერჟანტი გიორგი კიკაძე 1988 წლის 16 იანვარს ქალაქ ბორჯომში დაიბადა. ის საქართველოს შეიარაღებულ ძალებში 2009 წლიდან მსახურობდა. კრწანისის სასწავლო ცენტრში საბრძოლო მომზადების კურსის გავლის შემდეგ სერჟანტი კიკაძე II ქვეითი ბრიგადის საარტილერიო ბატალიონში ჩაირიცხა. 2012 წლის გაზაფხულზე მან სამშვიდობო მისიაში მონაწილეობის მისაღებად გადასროლის წინა მოსამზადებელი 6 თვიანი კურსი გაიარა. გიორგი კიკაძე ავღანეთში 2012 წლის ოქტომბერში გაემგზავრა.
თავდაცვის სამინისტრო სრულად აანაზღაურებს ავღანეთში დაღუპული სერჟანტ გიორგი კიკაძის დაკრძალვის ხარჯებს. ასევე, მის ოჯახს გადაეცემა კომპენსაცია.