საჯარო რეესტრის ეროვნული საგენტო 2012 წლის შედეგებს აჯამებს და განმარტავს, რომ 2012 წელს არაერთი მნიშვნელოვანი პროექტი განხორციელდა:
თბილისსა და რუსთავში დასრულდა დამისამართების პროექტი.
პროექტი მიზნად ისახავდა სამისამართო სისტემის განვითარებას და შესაბამისად, მოსახლეობის რეესტრის ერთიანი ბაზის გაუმჯობესებას. გამართული სამისამართო სისტემა მნიშვნელოვნად გააუმჯობესებს როგორც ქალაქგეგმარებას, შენობის, ქუჩის მიგნებას და აღქმას, ისე ყველა იმ პრობლემას, რომელიც მოსახლეობას მრავალი წელია აწუხებს.აღიწერა ყველა ქუჩა, სახლი და ბინა; შეგროვდა არსებული ქუჩების შესახებ დეტალური ინფორმაცია: განისაზღვრა თითოეული ქუჩის დასაწყისი და დასასრული, აღიწერა არსებული ხეივნები, უსაფრთხოების ობიექტები, ხიდები თუ სკვერები, დადგინდა ქუჩების მიმართულება და სხვა სამუშაოები; შეგროვდა ინფორმაცია საცხოვრებელი, ადმინისტრაციული, საგანმანათლებლო, სპორტული, კულტურული, სახელმწიფო, სავაჭრო, ჯანდაცვის, საბანკო და სხვა ტიპის შენობებზე.
სამისამართო ბაზა შეივსო სხვადასხვა მონაცემებით - ქუჩის მიმართულება, დასახელება, შენობის შიგნით ფართობების დანიშნულება (ლოჯია, სარდაფი, აივანი, სხვენი, სადარბაზო, ლიფტის შახტი, ავტოფარეხი, საოფისე-კომერციული ფართი და ა.შ.) ყველა კონკრეტულ ბინას მიება ინფორმაცია კომუნალური მომსახურების აბონენტის ნომრის, მობინადრეების შესახებ და სხვ.
განხორციელდა საკანონმდებლო ცვლილებები, რომლის თანახმადაც საჯარო რეესტრი ახორციელებს ნუმერაციის მინიჭებას და ცვლილებას ქ. თბილისში.
სეისმური დაკვირვების წარმოება უახლესი ტექნოლოგიების გამოყენებით გახდა შესაძლებელი.
საჯარო რეესტრის GPS სადგურების ბაზაზე ეტაპობრივად მიმდინარეობს სეისმური სადგურების ინსტალაცია და არსებული რესურსების (ელექტრო ენერგია, ინტერნეტ კავშირი და სხვა) გამოყენება, რაც ხელს შეუწყობს GPS და სეისმოსადგურების ერთობლივ, გამართულ ფუნქციონირებას. სეისმოსადგურების ხშირი ქსელის შექმნა მნიშვნელოვნად გააუმჯობესებს ქვეყნის მასშტაბით სეისმური პროცესების მონიტორინგს და რეგისრაციას, სეისმოეფექტების განსაზღვრას, სეისმური საშიშროების ზუსტ, დეტალურ და ობიექტურ შეფასებას და მიწისძვრის შედეგებისგან დაცვას. ასევე, სეისმოლოგიის დარგის სამეცნიერო-პრაქტიკულ კვლევებს. ყოველივე ეს კი საქართველოსთვის, როგორც სეისმურად აქტიური ზონისთვის, უაღრესად მნიშვნელოვანია.
100 ქართული ძეგლი Google Map-ზე განთავსდა.
პროექტი საქართველოს კულტურული მემკვიდრეობის დაცვის ეროვნული სააგენტოსა და საჯარო რეესტრის ურთიერთანამშრომლობით განხორციელდა. 100-მდე ქართული ძეგლი მათივე ზუსტი კოორდინატებით Google Map-შია ინტეგრირებული. Google-ის უპრეცენდენტო საძიებო სისტემაში საქართველოს შესახებ სივრცობრივი მონაცემები 2011 წელს განთავსდა. Google-ის ადმინისტრაციასთან მოლაპარაკებებს საჯარო რეესტრის ეროვნული სააგენტო აწარმოებდა.
შემცირდა საჯარო რეესტრის ონლაინ მომსახურების საფასური .
ამონაწერის მომზადება ელექტრონულად, ინტერნეტის საშუალებით ნაცვლად 15 ლარისა - 10 ლარი გახდა, ხოლო ამონაწერის დაჩქარებული წესით, განაცხადის შეტანის დღეს მომზადება ნაცვლად 50 ლარისა - 40 ლარია.
2012 წლის ივნისის თვიდან სააგენტოს დაემატა ისეთი მნიშვნელოვანი ფუნქცია, როგორიცაა მოქალაქეთა პოლიტიკური გაერთიანებების (პარტიების) რეესტრის წარმოება.
დაინერგა ახალი სერვისი - მობილური აპლიკაცია.
საჯარო რეესტრმა მოქალაქეებს კიდევ ერთ ახალ სერვისს შესთავაზა . ქონების ელექტრონულ ბირჟაზე განთავსებული უძრავი ქონების მოძიება ინტერნეტპორტალის გარდა, ახლა უკვე მობილური ტელეფონითაც გახდა შესაძლებელი. მოქალაქეს, რომლის მობილური ტელეფონი აღჭურვილია Android ოპერაციული სისტემით და აქვს ქართული ენის მხარდაჭერა, შეუძლია ქონების ელექტრონული ბირჟის პორტალიდან www.eproperty.ge უფასოდ ჩამოტვირთოს მობილური აპლიკაცია, რაც მას საშუალებას მისცემს მობილური ტელეფონის საშუალებით, სწრაფად და მარტივად მოიძიოს მისთვის სასურველი გასაყიდი, გასაქირავებელი თუ დასაგირავებელი უძრავი ქონება...
ახალი სერვისი მოქალაქეებს დაეხმარება სასურველი ბინის შერჩევისას დროის დაზოგვაში, ბინის მისამართის მარტივად მიგნებაში. აპლიკაცია რეალურ დროში, მუდმივად განახლებადია.
საჯარო რეესტრში 2013-2015 წლების სტრატეგიულ გეგმაზე მუშაობა დაიწყო.
2013-2015 წლების სტრატეგიული გეგმის საფუძველზე მოხდება მთელი რიგი ფუნქციების და სერვისების დანერგვა, არსებული პროცედურების გამარტივება . იგეგმება სამისამართო სისტემის მოწესრიგება საქართველოს დიდ ქალაქებში, გეოდეზია-კარტოგრაფიის სისტემის გაუმჯობსება, სარეგისტრაციო პროცედურების გამარტივება, მას. შეფასების სისტემის ამოქმედება, მონაცემთა ხარისხის გაუმჯობესება, ინგლისურენოვანი ბიზნესრეესტრის შექმნა და სხვ.
ქონებისა და და ბიზნესის შესახებ ამონაწერის აღება პრივატბანკის ტერმინალებით გახდა შესაძლებელი.
საჯარო რეესტრმა და პრივატბანკმა კიდევ ერთ ახალი სერვისი დანერგეს. მომხმარებლებს საჯარო რეესტრიდან უძრავი ქონებისა და ბიზნესის შესახებ ამონაწერის მიღება პრივატბანკის თვითმომსახურების ტერმინალების მეშვეობით, სწრაფად და მარტივად შეუძლიათ.
სოფელ წოდორეთში პილოტური პროექტი განხორციელდა.
პროექტის ფარგლებში სოფელ წოდორეთში 130 ჰექტარ მიწის ფართობზე განლაგებული 320 მიწის ნაკვეთის საკადასტრო აზომვითი სამუშაოები ჩატარდა. მიწის მესაკუთრეებთან შეთანხმებით დადგინდა სოფელ წოდორეთში მდებარე მიწის ყველა ნაკვეთის სწორი ადგილმდებარეობა და კოორდინატები, მოხდა ფაქტობრივი მდგომარეობის არსებულ დოკუმენტაციასთან შესაბამისობაში მოყვანა, გაიმიჯნა კერძო და სახელმწიფო საკუთრებაში არსებული მიწები, მოწესრიგდა და გაუმჯობესდა საჯარო რეესტრის გეომონაცემთა ბაზაში არსებული მონაცემები.
აღმაშენებლის გამზირის პანორამული გალერეა Google Earth განთავსდა.
საჯარო რეესტრმა Google Earth-ში ახალი პროექტის განხორციელება დაიწყო. პროექტის ფარგლებში პირველი 3D (სამ განზომილებიანი) გალერეა განახლებული აღმა¬შენებლის გამზირის ფოტოებით შეიქმნა. Google Earth-ზე დედაქალაქის ფოტოგალერეის დასატანად, საჯა¬რო რეესტრის სპეცილური ჯგუფი აწარმოებდა პანორამულ გადა¬ღებებს, Google-ის რუკაზე ტვირთავდა 3-განზომილებიან გამოსახულებებს. ეტაპობრივად Google Earth-ზე თბილისის ცენტრალური ქუჩები და საზოგადოებრივი მნიშვნელობის ობიექტების პანორამული გალერეაც განთავსდება.
გაზეთ ‘საჯარო რეესტრს" დაემატა ჩანართი რუსულ და ინგლისურ ენაზე.
გაზეთის პოპულარიზაციის მიზნით წლის განმავლობაში ტარდებოდა პრომო აქციები საქართველოს დიდ ქალაქებსა და რაიონებში.
საქართველოს მთავრობის 2012 წლის 28 ივნისის №231 დადგენილების საფუძველზე უფასო გახდა სასოფლო სამეურნეო დანიშნულების მიწის ნაკვეთის პირველადი რეგისტრაცია. 470 000 მიწის ნაკვეთზე დასრულდა საველე სამუშაოები.
საქართველოში მასობრივი შეფასების პროექტი დაიწყო.
პროექტის მიზანია, შემუშავებულ იქნას უძრავი ქონების შეფასების უნიფიცირებული მოდელი, რომელიც პირველ ეტაპზე გამოიყენება ადმინისტრაციული ორგანოების მიერ. უძრავი ქონების შეფასების საკითხი აქტუალურია როგორც სახელმწიფო ქონების პრივატიზების, ისე ქონების გადასახადის ადმინისტრირების, იპოთეკური სესხის თუ სხვა ასპექტით. მასობრივი შეფასების სისტემის პროექტი უზრუნველყოფს საქართველოში უძრავი ქონების შეფასებაში უნიფიცირებული, სტანდარტიზებული მიდგომის დამკვიდრებას.
2012 წელს საქართველოს 15 რაიონიდან განხორციელდა ტექ. ბიუროს არქივის ფიზიკურად გადმოტანა ქ. თბილისში (თელავი, გურჯაანი, ნინოწმინდა, ახალქალაქი, ბორჯომი, ახალციხე, ოზურგეთი, ჩოხატაური, ქუთაისი, ვანი, საჩხერე, ონი, ამბროლაური, ცაგერი, ლენტეხი). ამ რაიონებში მოთხოვნილი ცნობა-დახასიათების, გეგმის და ყველა საინფორმაციო დოკუმენტის მომზადება ხდება ცენტრალიზებულად, ქ. თბილისიდან. ასევე, 2012 წელს სისტემურად დამუშავდა და ელექტრონულ ბაზაში აისახა ბათუმის საარქივო მასალა.
დაიწყო საჯარო რეესტრის არქივის ცენტრალიზება. რეგიონებიდან საჯარო რეესტრის სარეგისტრაციო მასალები ფიზიკურად გადმოვიდა ლილოს საცავში და მოხდა მათი აღწერა. ქაღალდის ვერსიის აღწერის პარალელურად შეიქმნა მონაცემთა ელექტრონული ბაზა. შესაბამისად, ამ რაიონებში მოთხოვნილი დოკუმენტის მომზადება ხდება ცენტრალიზებულად, ქ. თბილისიდან. სრულად აღიწერა აჭარის და გურიის რეგიონის სარეგისტრაციო მასალები. ასევე, საჯარო რეესტრის არქივის მიერ განხორციელდა 5 რაიონის სარეგისტრაციო მასალების გადმოტანა, მათი აღწერა და ელექტრონულად დამუშავება (საჩხერე, ცაგერი, წალენჯიხა, ხარაგაული, ლენტეხი).
მოქალაქის პორტალს ბიზნესის ონლაინ რეგისტრაციის ფუნქცია დაემატა.
პროექტის ავტორი და განმახორციელებელი საქართველოს მონაცემთა გაცვლის სააგენტოა, მომსახურების მომწოდებელი კი - საჯარო რეესტრის ეროვნული სააგენტო. მოქალაქის პორტალს www.my.gov.ge დაემატა ბიზნესის ონლაინ რეგისტრაციის ფუნქცია, რომელიც ბიზნესის დაწყების მსურველს საშუალებას აძლევს მარტივი პროცედურების გავლით, სახლიდან და ოფისიდან გაუსვლელად, ან მსოფლიოს ნებისმიერი ქვეყნიდან დაარეგისტრიროს ბიზნესი. ბიზნესის დასარეგისტრირებლად სავალდებულო არაა, დაინტერესებული პირი უშუალოდ მივიდეს საჯარო რეესტრის ტერიტორიული სამსახურში ან იუსტიციის სახლი.
საჯარო რეესტრი გაწევრიანდა ევროპის კომერციულ რეესტრთა ფორუმში (ECRF),
რომლის მიზანია ევროპის ქვეყნების სამეწარმეო რეესტრთა მომსახურების და ზოგადად, ბიზნეს გარემოს გაუმჯობესება, ტექნიკური და პრაქტიკული პროცედურების, კანონებისა და რეგულაციების გამარტივება/დახვეწა, ბიზნეს რეესტრების თავსებადობის მიღწევა და ევროპაში ერთიანი ბაზრის განვითარების ხელშეწყობა.
საჯარო რეესტრის მიერ დამუშავებული მონაცემები ჩაერთო „ევროპის გლობალური რუკაში". ამჟამად მიმდინარეობს მონაცემების შეგროვება-დამუშავება „ევროგეოგრაფიკსის" სხვა პროდუქტებისთვის (მაგ.-ად, „ევროპის რეგიონული რუკა"). აღსანიშნავია, რომ მონაცემების შექმნა ხდება ევროპაში მიღებული სტანდარტებისა და სპეციფიკაციების მიხედვით, რაც უზრუნველყოფს შემდგომში მონაცემების თავსებადობას ევროპულ სისტემებთან.
საჯარო რეესტრის გამოცდილების გაზიარების და მისი მიღწევების გაცნობის მიზნით, ქონების და ბიზნესის რეგისტრაციის ქართული მოდელის გასაცნობად სააგენტომ 2012 წელს მიიღო დელეგაციები სხვადასხვა ქვეყნიდან, მათ შორის: უკრაინა, სომხეთი, აზერბაიჯანი, ყირგიზეთი, ყაზახეთი, ავღანეთი, განა, მოლდავეთი.
საჯარო რეესტრმა 330 ავტორიზებულ პირთან გააფორმა ურთიერთთანამშრომლობის მემორანდუმი. წლის განმავლობაში ავტორიზებული პირების მიერ ელექტრონულად მიღებულია 149 379 სარეგისტრაციო განცხადება, რაც საერთო რაოდენობის 14% შეადგენს.
ნოტარიუსებს უძრავი ქონებისა და ბიზნესის რეგისტრაციის უფლება მიენიჭათ. საკანონმდებლო ცვლილებების საფუძველზე, საჯარო რეესტრის პარალელურად, უძრავ ქონებასთან დაკავშირებული გარიგებებისა და კომპანიების რეგისტრაციის უფლება ნოტარიუსებსაც მიენიჭათ, რაც მომხმარებელს საშუალებას აძლევს, როგორც სანოტარო, ისე საჯარო რეესტრის მომსახურება ერთ სივრცეში მიიღოს. მაგალითად, ნოტარიუსთან ნასყიდობის ხელშეკრულების გაფორმებისას, მომხმარებელს უძრავ ქონებაზე საკუთრების უფლების რეგისტრაციისას, აღარ უწევს საჯარო რეესტრში მისვლა; ნოტარიუსი თავად ახდენს საკუთრების უფლების რეგისტრაციას და ამონაწერსაც გასცემს.
დოკუმენტბრუნვის ელექტრონულ სისემაში დაიწყო ფასიანი მომსახურების ბილინგით განხორციელება.
2012 წლის განმავლობაში მედია საშუალებებით სისტემატურად შუქ¬დე¬ბოდა საჯარო რეესტრის მიერ დაგეგმილი და განხორციელებული პროექტები.
წარმატება
მსოფლიო ბანკისა და საერთაშორისო საფინანსო კორპორაციის მიერ ჩატარებული კვლევის მიხედვით, უძრავი ქონების რეგისტრაციის სფეროში განხორციელებული რეფორმების შედეგად, საქართველომ 181 ქვეყანას შორის პირველი ადგილი დაიკავა.
ინფორმაციული ტექნოლოგიების სამსახურმა GITI (Georgian IT Innovations) კონფერენციაზე „ინფორმაციული უსაფრთხოების საუკეთესო მენეჯმენტისთვის" ჯილდო დაიმსახურა.
იუსტიციის სამინისტროს ორგანიზებით ჩატარებულ ტურნირზე ინტელექტუალურ თამაშში რა? სად? როდის? საჯარო რეესტრის გუნდმა პირველი ადგილი და გარდამავალი ჯილდო „ბროლის ბუ" მოიპოვა.
საჯარო რეესტრის ფეხბურთელთა გუნდმა იუსტიციის სამინისტროს თასზე გამართულ ჩემპიონატში პირველი ადგილი დაიკავა.
სოციალური პროექტები
საჯარო რეესტრი აქტიურად მონაწილეობდა საქველმოქმედო აქციაში „ჩვენ ერთი სახლი გვაქვს". აქცია მზრუნველობამოკლებული ბავშვების მხარდასაჭერად ყოველწლიურად იმართება;
საჯარო რეესტრის თანამშრომლებმა სოფელ დიდ ლილოში, არქივის შენობის მიმდებარე ტერიტორიაზე მარადმწვანე ხეები (60 ძირი ფიჭვი) დარგეს;
საჯარო რეესტრის თანამშრომლების ინიციატივით მოეწყო შეხვედრა თანამედროვეობის ერთ-ერთ უდიდეს მწერალთან გურამ დოჩანაშვილთან;
საჯარო რეესტრი შეუერთდა სპორტისა და ახალგაზრდობის სამინისტროს მიერ ორგანიზებულ აქციას „მწვანე ყუთი". აქციის ფარგლებში სააგემტომ 3 ტონამდე ქაღალდის ნარჩენი ჩააბარა გადამამუშავებელ ქარხანას.