,,ობიექტივის" ლიცენზიის საკითხი კვლავ გაურკვეველია და ამ კუთხით, არანაირი ძვრები არ არის", _ განაცხადა ,,ჯი-ეიჩ-ენთან" საუბარში მედიაკავშირ ,,ობიექტივის" ხელმძღვანელმა ირმა ინაშვილმა ჩამორთმეული სატელევიზიო სიხშირის კომენტირებისას და იმედი გამოქვა, რომ სამართლიანობა აღდგება.
,,დიდი იმედი მაქვს, რომ სამართლიანობა აღდგება და 2013 წელს ,,ობიექტივი" შეძლებს დეციმეტრულ სიხშირეზე გასვლას, რაც ნიშნავს იმას, რომ თბილისის მასშტაბით მოსახლეობა ტელევიზიის საშუალებით გვიყურებს", -განაცხადა ინაშვილმა და აღნიშნა, რომ მედიაკავშირი ,,ობიექტივი" პროგრამულ ბადეს ანახლებს და ხვალიდან ინტერნეტში განახლებული სატელევიზიო ტიხრები გავა.
"არ შევცვლით მთავარ მიმართულებას_საზოგადოებრივი მაუწყებლის მოდელს, რომლის მიხედვით, ეთერში გამოსვლის საშუალება ნებისმიერ ადამიანს აქვს მისი პოლიტიკური, რელიგიური მრწამსის, ასაკის თუ პროფესიის მიუხედავად", -განაცხადა სააგენტო ,,ჯი-ეიჩ-ენთან" საუბარში ირმა ინაშვილმა.
შეგახსენებთ, რომ ტელეკომპანია „ობიექტივი" 2001 შეიქმნა და მხოლოდ თბილისში №35-ე სიხშირეზე მაუწყებლობდა. 2004 წელს ვარდების რევოლუციის შემდეგ მოსულმა ხელისუფლებამ მარეგულირებელი კომისიის და მისი ხელმძღვანელის დიმიტრი ქიტოშვილის გამოყენებით 2004 წელს ჟურნალისტებს ტელეკომპანიის სიხშირე უკანონოდ წაართვა. სიხშირემ რამდენიმე მფლობელი გამოიცვალა, მათ შორის პროფესიით სტომატოლოგი და დიმიტრი ქიტოშვილის მეგობარი დავით კაკაურიძე, რომელმაც, თავის მხრივ, საკუთარი წილი 2007 წლის 13 სექტემბერს კომუნიკაციების მარგულირებელი კომისიის მაშინდელი თავმჯდომარის მოვალეობის შემსრულებლის, სოფიო ბრიტანჩუკის მეუღლეს, ვინმე ნოდარ ჭარხალაშვილს აჩუქა. მოგვიანებით ჭარხალაშვილმა სიხშირის 51 პროცენტი ვინმე გურამ კვირიკაშვილს გადაუფორმა. ამ უკანასკნელმა კი ეს წილი სახელმწიფოს აჩუქა. ინაშვილი ვარაუდობს, რომ ეს ყველაფერი კვალის არევას ემსახურებოდა.
მასალის გამოყენების პირობები