22 დეკემბერს, ანუ მას შემდეგ, რაც ცნობილი გახდა, რომ „სამყაროს აღსასრული" არ დადგა, მზემ კაცობრიობას „თვალი ჩაუკრა" - ამის შესახებ ინფორმაციას „ნასა" ავრცელებს, რომელმაც მზის „თვალის ჩაკვრა" ფოტოებზე გადაიღო.
„თვალის ჩაკვრა" მზის ზედაპირზე მიმდინარე მაგნიტურმა აქტიურობამ გამოიწვია. სურათები ძალიან ჰგავს კადრებს პირველი სამეცნიერო-ფანტასტიკური ფილმიდან, „მოგზაურობა მთვარეზე" - წერს „დეილი მეილი". ფოტოებს, მეცნიერების განმარტებით, დიდი პრაქტიკული ღირებულება აქვს სამისოდ, რომ შევიტყოთ გაცილებით მეტი იმ პროცესებზე, რომელიც მზის ზედაპირზე მიმდინარეობს.
„ნასამ", ფოტოების კომენტირებისას, განაცხადა, რომ მათ ამ ფოტოებზე „სამყაროს აღსასრულის" წინ არსებული შიშები გაახსენდათ. „მიუხედავად ძველი მაიას ტომების წინასწარმეტყველებისა, რომ დედამიწას უცხო პლანეტა უნდა შეჯახებოდა, ჩვენ გადავრჩით და კვლავ აქ ვართ" - იუმორით აღნიშნა არქეოასტრონომიის ცენტრის ხელმძღვანელმა, ჯონ კარლსონმა. კარლსონი ერთ-ერთი ავტორია იმ ფილმისა, რომელიც ინტერნეტში გავრცელდა სახელწოდებით, „რატომ არ დადგა სამყაროს აღსასრული ადრე". ფილმმა მომხმარებლების ნაწილში გააჩინა ეჭვი, რომ „ნასას" თანამშრომლებს თავადაც ეშინოდათ „სამყაროს აღსასრულის", რის გამოც ის ქსელიდან ამოიღეს და მხოლოდ 22 დეკემბრიდან მოხდა კვლავ მისი გავრცელება.
