შინაგან საქმეთა მინისტრისა და თბილისის მერის ყოფილი მოადგილის შოთა ხიზანიშვლის, ასევე კუდ-ის უფროსის ყოფილი მოადგილის ვაჟა ლელუაშვილის წინასასამართლო სხდომა 14 თებერვლისთვის გადაიდო. მიზეზად პროკურატურამ საგამოძიებო ვადის გაგრძელება დაასახელა.
ადვოკატების განცხადებით, ამნისტიის კანონის ამოქმედების შემდეგ, შოთა ხიზანიშვილს წაყენებული ორი ბრალდებიდან ერთი, ხოლო ლელუაშვილს 5 ბრალიდან ორი უბათილდება.
ამ გარემოების გათვალისწინებით, უახლოეს დღეებში დაცვის მხარე საქალაქო სასამართლოს მიმართავს შუამდგომლობით, რომ ორივე ბრალდებულს აღკვეთის ღონისძიება პატიმრობა გირაოთი შეეცვალოს.
შეგახსენებთ, რომ შოთა ხიზანიშვილს ბრალად ედება სამსახურებრივი მდგომარეობის გამოყენებით კერძო კომუნიკაციის ჩანაწერის ტექნიკური საშუალებით მოპოვებული ინფორმაციის და კომპიუტერული მონაცემის უკანონოდ გამოყენება და გავრცელება. აგრეთვე, - მოხელის მიერ სამსახურებრივი უფლებამოსილების გადამეტება, რამაც ფიზიკური და იურიდიული პირის უფლების და კანონიერი ინტერესის არსებითი დარღვევა გამოიწვია. ლელუაშვილს კი ბრალად ედება სამსახურეობრივი მდგომარეობის გამოყენებით კერძო საუბრის უნებართვო მიყურადება-ჩაწერა, კომპიუტერულ სისტემაში და სისტემიდან კერძო კომუნიკაციისას გადაცემული კომპიუტერული მონაცემების მოპოვება ტექნიკური საშუალების გამოყენებით; წინასწარი შეთანხმებით ჯგუფის მიერ კომპიუტერულ სისტემაში უნებართვო შეღწევა; კომპიუტერულ სისტემაში და სისტემიდან კერძო კომუნიკაციისას გადაცემული კომპიუტერული მონაცემების მოპოვების, ტექნიკური საშუალებით მოპოვებული ინფორმაციის და კომპიუტერული მონაცემის უკანონოდ გამოყენების და გავრცელების მიზნით სამსახურებრივი მდგომარეობის გამოყენებით, წინასწარი შეთანხმებით ჯგუფის მიერ; კომპიუტერული პროგრამის, ასევე კომპიუტერულ სისტემაში შეღწევისათვის საჭირო მონაცემის უნებართვო დამზადება, შენახვა, გავრცელება და ხელმისაწვდომობის სხვაგვარი უზრუნველყოფა; მოხელის მიერ სამსახურებრივი უფლებამოსილების გადამეტება, რამაც ფიზიკური და იურიდიული პირის უფლების და კანონიერი ინტერესის არსებითი დარღვევა გამოიწვია. აგრეთვე, სხვისი ნივთის დაზიანება და განადგურება, რამაც მნიშვნელოვანი ზიანი გამოიწვია.