23 დეკემბერს აჭარაში, 2012 წლის შედეგების მიხედვით, კერძო სექტორში მოღვაწე წარმატებული ქალები გამოვლინდებიან. ღონისძიების ორგანიზატორები არიან "აჭარის ქალ ბიზნესმენთა ასოციაცია" და აჭარის სავაჭრო სამრეწველო პალატა. პალატის ინფორმაციით, ქალების მიერ დაფუძნებული კომპანიები ტურიზმის, განათლების, მშენებლობის, მედიცინის, კვების, ქალთა მომსახურების და ლუდის წარმოებაშიც ოპერირებენ. "აჭარის ქალ ბიზნესმენთა ასოციაცია" 2012 წლის 1-ელ ოქტომბერს დაფუძნდა.
ასოციაციის თავმჯდომარის მაყვალა კვირიკაძის განცხადებით, დაჯილდოების ცერემონიაში მონაწილეობა შეუძლია ყველა ქალს, რომელიც ეწევა სამეწარმეო საქმიანობას. ღონისძიება პირველად გაიმართება და აქედან გამომდინარე ის გაცნობით ხასიათისა იქნება. აჭარის ქალ ბიზნესმენთა შეხვედრა-დაჯილდოების ცერემონიაში მონაწილეობას მიიღებს დაახლოებით 60 კომპანია. წარმატებული საქმიანი ქალები დაჯილდოვდებიან შემდეგ ნომინაციებში: წლის მენეჯერი ქალბატონი; წლის ახალგაზრდა ბიზნესქალი (დაწესებულია ასაკობრივი ზღვარი 35 წელი); წლის საუკეთესო მეწარმე ქალბატონი; ქალი ბიზნესის რეგიონალურ განვითარებაში; განათლებაში შეტანილი წვლილისთვის; წლის "ბიზნესვუმენი"; საოჯახო ბიზნესის განვითარებაში; "ოჯახი და ბიზნესი" მრავალშვილიანი ბიზნესმენი ქალი; წლის ქველმოქმედი ბიზნესმენი ქალი; ბიზნესპარტნიორი ქალი; სერვისი და ქალბატონი.
"აჭარის ქალ ბიზნესმენთა ასოციაცია" აჭარის სავაჭრო-სამრეწველო პალატასთან ერთად, ღონისძიების ფარგლებში, 23 დეკემბერს ბათუმში, ჩინურ რესტორანში, რეგიონის წარმატებული ქალების დაჯილდოების ცერემონიას პირველად გამართავს.
