დღეს, 22 დეკემბერს, 16:00 საათზე, საქართველოს პარლამენტის ეროვნული ბიბლიოთეკის საგამოფენო დარბაზში (გუდიაშვილის ქ.№7) კულტურის კვლევისა და კოორდინირების ცენტრი წარმოადგენს ბარსელის და გოგა არეშიძის (რეშკა) საღამოს "უსათაუროდ..."
"საათ-ნახევრის განმავლობაში დამსწრე საზოგადოების წინაშე პირველად გაიმართება პოზიისა და ფერწერის სრულიად არაორდინალური დიალოგი. პოეტი ბარსელი და მხატვარი გოგა არეშიძე (რეშკა) შემოგთავაზებენ სამყაროს აღქმის თავისებური ინტერპრეტაციის სინთეზს. მათი სამყარო ფილოსოფიური აზროვნებითა და მისტიციზმითაა გაჯერებული. ორივეს შემოქმედებაში სიმბოლიკასა და ალეგორიას სიღრმისეული გააზრების განსაკუთრებული დატვირთვა აქვს. შედგება შემოქმედებითი ტანდემი, რომელიც დაგვირგვინდება გარეშე თვალისთვის მოულოდნელი ეფექტით. ბგერიდან მოედინება უშუალო ფერი, რომელიც გადაედება ფორმას. შუქ-ჩრდილებით, ოფორტის ტექნიკის მეშვეობით, სიტყვისა და მონასმის ჰარმონიით პერფორმანსის მსვლელობისას თეთრი ტილო, რომელიც ამ შემთხვევაში გარკვეული საინფორმაციო კედლის დატვირთვას ითავსებს, იძენს დასრულებული ფერწერული ნამუშვრის ფორმას. დამსწრე საზოგადოება უნებლიეთ ხდება ამ ექსპერიმენტის უშუალო თანამონაწილე. მნახველი და ამავდროულად მსმენელი აღიქვამს და დაინახავს იმას, რასაც ისმენს პოეზიის სახით. ინფორმაცია, რომელიც ილექება გონებაში ლექსის სმენისა და მხატვრის მოქმედებას შედეგად საბოლოო ჯამში ვიზუალიზაციას განიცდის", - აცხადებენ ღონისძიების ორგანიზატორები.