ასტრახანში XVIII დაკრძალული ქართველი მეფეების, ვახტანგ-ისა VI და თეიმურაზ II-ის ნეშტები, შესაძლოა, სამშობლოში დააბრუნონ. საქართველოს ახალ ხელისუფლებას ამ საკითხის უსწრაფესად გადაწყვეტის იმედი აქვს. რუსეთი კი ჯერ მზად არ არის, ამ პრობლემის გადაჭრის კონკრეტული ვადები დაასახელოს. ინფორმაციას ამის შესახებ გაზეთი "იზვესტია" ავრცელებს.
"საქართველოს კათალიკოს-პატრიარქის, ილია მეორის წერილი პატრიარქ კირილისა და რუსეთის პრეზიდენტის მიმართ, რომელშიც ასტრახანში უსპენსკის კათედრალური ტაძრის ქვედა დონეში დაკრძალული ორი ქართველი მეფის ნეშტების გადმოსვენებას ეხება, გასული წლის ნოემბერში გადმოგვეცა, მაშინ, როდესაც საქართველოს პატრიარქი მოსკოვს სტუმრობდა", _ აცხადებს "იზვესტიასთან" საუბრისას მოსკოვის საპატრიარქოს საგარეო კავშირების განყოფილების უფროსის მოადგილე, სასულიერო პირი მამა ნიკოლაი ბალაშოვი.
მისი თქმით, პატრიარქ კირილის ინიციატივით შეიქმნა ორმხრივი კომისია, რომლის მიზანია, განიხილოს ამგვარი გადასვენების განხორციელების საკითხი.
"კომისიამ მუშაობა ახლახან დაიწყო. 13 დეკემბერს პირველი სხდომა გაიმართა. კომისიას წინ დიდი სამუშაო აქვს. შესასწავლი დიდი რაოდენობით ისტორიული და არქეოლოგიური მასალა. აუცილებელია სრული სინათლის შეტანა თავად ქართველი მეფეების სურვილში", _ აცხადებს რუს სასულიერო პირი.
მისი თქმით, თეიმურაზ II-ის ანდერძის ორიგინალი ნაპოვნი ჯერაც არ არის და გაუგებარია, რატომ გადაწყვიტა მისმა თანმხლებმა ქართველობამ მისი ასტრახანში დაკრძალვა. კიდევ უფრო გაუგებარი სიტუაციაა მეორე მეფესთან დაკავშირებით.
"ვახტანგ VI-მ თავის ბოლო წლები ასტრახანში გაატარა და ჩვენ ჯერ არ გვაქვს იმის არავითარი მოწმობა, რომ მან თავისი ნეშტის დაკრძალვა რომელიმე სხვა ადგილზე მოითხოვა. ალბათ, ქართველ მეცნიერებს სხვა მონაცემები აქვთ ამასთან დაკავშირებით. ამ ეტაპზე მთავარია თავად მეფეების ნამდვილი სურვილი დავადგინოთ და შემდეგ უკვე ვიფიქროთ იმაზე, თუ როგორ და რანაირად აღვასრულოთ ის", _ აცხადებს მამა ნიკოლაი ბალაშოვი.
