პარიზის ხელისუფლებამ რომის პაპის, იოანე პავლე მეორის ქანდაკების დადგმაზე უარი განაცხადა. ქანდაკება რუსეთში მოღვაწე ქართველი მოქანდაკის, ზურაბ წერეთლის მიერ არის შექმნილი და მისი დადგმა საფრანგეთში პოლონეთის კათოლიკური მისიის ეკლესიის ახლოს იგეგმებოდა.
როგორც გაზეთი „Le Figaro" იუწყება, პარიზმა მომუმენტის დადგმაზე უარი ესთეტიკური მოსაზრებებით თქვა. გავრცელებული ინფორმაციით, სპეციალურად შექმნილმა ექსპერტთა კომისიამ განაცხადა, რომ პონტიფიკოსის ქანდაკება პოლონური ეკლესიის არქიტექტურულ სტილს არღვევს.
თუმცა, სხვა მოსაზრება აქვს პოლონეთის კათოლიკური მისიის ხელმძღვანელს, რომელიც ირწმუნება, რომ გადაწყვეტილებას საფუძვლად იდეოლოგიური მოტივები უდევს. მისი თქმით, ქალაქის ხელმძღვანელობამ არ გაითვალისწინა 5000 პარიზელის მოთხოვნა, რომელთაც ქანდაკების ამ ტერიტორიაზე განთავსებას ხელმოწერების საშუალებით დაუჭირეს მხარი.
იოანე პავლე მეორის ეს ქანდაკება პირველი არ არის, რომელიც წერეთელს ეკუთვნის. პაპის ქანდაკება, ცნობილმა ქართველმა მოქანდაკემ 2006 წელსაც შექმნა და ის საფრანგეთის ქალაქ პლოერმელშია განთავსებული.