საქართველოს პარლამენტის იურიდიულ საკითხთა კომიტეტის გადაწყვეტილებით, ამნისტიის კანონპროექტი, უვადოდ თავისუფლებააღკვეთილი მსჯავრდებულების გარდა, ყველა პატიმარს შეეხება.
"ამნისტიის შესახებ" საქართველოს კანონპროექტი იურიდიულ საკითხთა კომიტეტმა მუხლობრივად განიხილა და II მოსმენით დაამტკიცა.
პარლამენტის წევრმა კობა დავითაშვილმა მე-5 მუხლის მეორე ნაწილის ალტერნატიული წინადადება წამოაყენა.
სასიკვდილო შედეგით დასრულებულ გაუფრთხილებითი დანაშაულის ჩამდენი პირისთვის სისხლის სამართლის პასუხისმგებლობის და სასჯელისგან გათავისუფლება შესაძლებელი იქნება, თუ დაზარალებულის უფლებამონაცვლე გარდაცვლილია ან არ იძებნება, ამნისტია გამოიყენება დაზარალებულის ოჯახის ყველა წევრის თანხმობის გამოთქმის შემთხვევაში.
კომიტეტის წევრების გადაწყვეტილებით, ცვლილებები კანონპროექტის მე-17 მუხლსაც შეეხო.
წარმოდგენილი რედაქციით, 1/4-ით სასჯელის შემცირება არ ვრცელდებოდა იმ მსჯავრდებულებზე, რომლებიც სისხლის სამართლის კოდექსის 108, 109, 137-ე მუხლის მე-4 და მე-5 პუნქტებით, 138-ე მუხლის მე-4 და მე-5 პუნქტებით და 323-ე მუხლის მე-3 ნაწილით იყვნენ გასამართლებული. ამ მუხლებით მსჯავრდებულთა რაოდენობა კი 540 პატიმარს შეადგენს.