"ნასას" მეცნიერები იმდენად დარწმუნებულები არიან, რომ 21 დეკემბერს აპოკალიფსი არ მოხდება, რომ ვიდეოც კი გაავრცელეს სახელმწოდებით, "რატომ არ დადგა სამყაროს აღსასრული გუშინ".
მათ ფაქტებით და მტკიცებულებებით გააბათილეს ყველა მითი, რომელიც დაკავშირებულია მაიას ტომის კალენდართან. როგორც ცნობილია, გავრცელებული ხმები "სამყაროს აღსასრულის" შესახებ მაიას კალენდარს უკავშირდება, რომლის მიხედვითაც ირწმუნებიან, რომ სამყაროს აღსასრული 2012 წლის 21 დეკემბერს მოხდება. "ნასამ" ამ თემასთან დაკავშირებული ყველა ვარაუდი უარყო.
ერთ-ერთი მითის მიხედვით, დედამიწას პლანეტა ნაბირუ უახლოვდება, რომელიც ძველმა შუმერებმა აღმოაჩინეს. "ნასას" მეცნიერები კი ამტკიცებენ, რომ ასეთი პლანეტა არ არსებობს. მეორე თეორიის მიხედვით, დედამიწის ელექტრულ ველს ძლიერი ციკლონი დაატყდება, რაც ყველა ელექტრონულ კავშირს გაწყვეტს. დედამიწა კი გაივლის ე.წ. შავ ხვრელს, მაგრამ "ნასაში" ირწმუნებიან, რომ ასეთი ვარაუდისთვის არანაირი საფუძველი არ არსებობს. დედამიწას არანაირი კომეტა ან ასტეროიდი არ უახლოვდება, რომელიც მასთან დაჯახების საფრთხეს ქმნის. საამისო საშიშროების შემთხვევაში, თანამედროვე ტექნოლოგიების წყალობით, ისინი დიდი ხნის გამოვლენილი იქნებოდა.
