ჭადრაკის სასახლეში ომის ვეტერანთა სხვადასხვა გაერთიანების გაფართოებული შეხვედრა გაიმართა. შეხვედრას საქართველოს თავდაცვის მინისტრი ირაკლი ალასანია დაესწო. ვეტერანებმა შეღავათების აღდგენის საკითხებსა და მომავალ გეგმებზე ისაუბრეს.
საქართველოს პრემიერ-მინისტრის ინიციატივით, ომის ვეტერანთა პრობლემების მოგვარებაზე სპეციალურად შექმნილი სამუშაო ჯგუფი იმუშავებს. მან საქართველოს მთავრობას სპეციალური წინადადებების პაკეტის მომზადება დაავალა. საქართველოს თავდაცვის მინისტრის განცხადებით, ძალიან მნიშვნელოვანია, რომ საქართველოში ვეტერანთა ორგანიზაციებმა დაიწყეს თვითორგანიზება. ეს ხელს შეუწყობს, რაც შეიძლება სწრაფად მოხდეს მათი წარმომადგენლების ჩართვა პრემიერ-მინისტრ ივანიშვილის მიერ ინიცირებულ სამთავრობო კომისიაში.
"ქვეყანა ფასობს იმით, თუ როგორ ეპყრობა, როგორ ექცევა და როგორ ინახავს ვეტერანებს. სამწუხაროდ, ამ კუთხით საქართველოს საამაყო არაფერი არ აქვს. თუმცა საამაყო ვეტერანები გვყავს და ის ადამიანები, ვინც ჯანმრთელობა გაწირეს ქვეყნისთვის, უნდა იყვნენ შესაბამისად დაფასებულნი. ეს სჭირდება ჩვენს მომავალს და ჩვენს ჯარისკაცებს", - განაცხადა ალასანიამ ვეტერანებთან შეხვედრის შემდეგ.
მისი თქმით, ვეტერანთა სოციალურ პაკეტსა და ვეტერანთა დეპარტამენტის მოდელის შექმნაზე მუშაობა უკვე დაწყებულია.