პროკურატურა მზად არის ბუტა რობაქიძის მეგობრებს ბრალი მოუხსნას, -აღნიშნულის შესახებ ინფორმაცია თბილის საქალაქო სასმართლოში გახდა ცნობილი, სადაც საქმის განხილვა 17 დეკემბრისთვის გადაიდო.
"ბიჭებს ყველა ბრალდება უნდა მოეხნას, ეს საკითხი ორშაბათს ალბათ საბოლოოდ გადაწყდება, რის შემდეგაც ჩვენ დავიწყებთ იმის გარკვევას რომ ამ ბიჭებს იარაღი ჩაუდეს",- განცხადა ჟურნალისტებთან სოსო რობაქიძემ.
შეგახსენებთ, რომ ადვოკატ არჩილ ჩოფიკაშვილის ინფორმაციით, ბრალდებულები 8 წლის განმავლობაში, უშედეგოდ ამტკიცებდნენ 2004 წლის 24 ნოემბერს მათთვის იარაღის ჩადების ფაქტს, რითაც გამართლდებოდა მათი მეგობრის - ბუტა რობაქიძის მკვლელობა.
მისივე თქმით, მომხდარს თავდაპირველად მიენიჭა აუცილებელი მოგერიების ფარგლებს გადაცილებული მკვლელობის კვალიფიკაცია, რათა მკვლელობის მოტივად დასახელებული აუცილებელი მოგერიება გამხდარიყო აღნიშნული საქმის შეწყვეტის მიზეზი. მოგვიანებით, საზოგადოებრივი პროტესტის შედეგად, მკვლელი პოლიციელი - ბაშალეიშვილი გასამართლდა გაუფრთხილებლობით ჩადენილი მკვლელობისთვის.
"2012 წლის ნოემბრიდან პროკურატურამ დაიწყო ხელახალი გამოძიება მომხდარ უმძიმეს დანაშაულზე და აღნიშნულ საქმესთან დაკავშირებით ყოფილი თანამდებობის პირთა პასუხისმგებლობის საკითხი უკვე დადგა.მიუხედავად ამისა, ქურდაძის მიმართ ბრალდება დღემდე არ არის მოხსნილი და მას შეფარდებული აქვს აღმკვეთი ღონისძიება. მოკლული ბუტა რობაქიძის მეგობრების მიმართ დღემდე ხორციელდება სისხლის სამართლებრივი დევნა და აღნიშნულ საქმეზე, მათ მიმართ 8 წლის განმავლობაში არცეთი პროცესი არ გამართულა", - აცხადებს ადვოკატი.
არჩილ ჩოფიკაშვილი განსასჯელთა გამართლებას მოითხოვს და იმედს გამოთქვამს, რომ ქურდაძისა და მისი მეგობრების მიმართ ფალსიფიცირებული ბრალდების მოხსნა გახდება სამართლიანობის აღდგენის და მართლმსაჯულების სამართლებრივ სივრცეში დაბრუნების საფუძველი.
