საქართველოს პრეზიდენტი, მიხეილ სააკაშვილი ღრმა მწუხარებას გამოთქვამს სოფელ წევასთან მომხდარი ავარიის გამო, რომელსაც შვიდი ადამიანის სიცოცხლე ემსხვერპლა. მიხეილ სააკაშვილის განცხადება პრეზიდენტის ადმინისტრაციამ გაავრცელა.
განცხადებაში აღნიშნულია, რომ მიხეილ სააკაშვილი თანაუგრძნობს და უსამძიმრებს გარდაცვლილთა ოჯახებსა და ახლობლებს.
შინაგან საქმეთა სამინისტროს ინფორმაციით, იმერეთში, სოფელ წევასთან ავტოსაგზაო შემთხვევა გუშინ, დაახლოებით, 20:00 საათზე მოხდა.
ქუთაისი-თბილისის მიმართულებით მოძრავი სატვირთო მანქანის ბორტიდან ლითონის რულონი გადმოვარდა, რომელიც საპირისპიროდ მოძრავ მიკროავტობუსს დაეცა.
მიკროავტობუსის მძღოლი და ხუთი მზგავრი, მათ შორის ორსული ქალბატონი, შემთხვევის ადგილზე გარდაიცვალა, ხოლო ერთი - საავადმყოფოში მიყვანისთანავე.
შსს-ს ცნობით, სატვირთო ავტომობილის მძღოლი თურქეთის მოქალაქეა და ის ამჟამად დაკავებულია. მომხდარ ავტოსაგზაო შემთხვევასთან დაკავშირებით გამოძიებას აწარმოებს შს საპატრულო პოლიციის იმერეთის მთავარი სამმართველო საქართველოს სსკ-ის 276-ე მუხლის პირველი და მესამე ნაწილებით, რაც 10 წლამდე თავისუფლების აღკვეთას ითვალისწინებს.