თბილისში საცხოვრებელი ბინიდან დიდი რაოდენობით იარაღი ამოიღეს. "თავდაცვის სამინისტროს სამხედრო პოლიციამ საქართველოს შსს ვაკე-საბურთალოს რაიონული სამმართველოს პოლიციასთან ერთად თბილისში ერთ-ერთი საცხოვრებელი ბინიდან დიდი რაოდენობით შეიარაღება ამოიღო", - განაცხადა ჟურნალისტებთან თავდაცვის უწყებაში გამართულ პრესკონფერენციაზე თავდაცვის მინისტრის მრჩეველმა ვაკო ავალიანმა.
მისი განცხადებით, საცხოვრებელი ბინიდან ამოღებული სხვადასხვა კალიბრისა და მოდელის მაყუჩიანი იარაღი რეგისტრირებული არ არის. როგორც ავალიანმა მედიის წარმომადგენლებთან განაცხადა, იარაღის არსებობის შესახებ თავდაცვის სამინისტროსთვის ცნობილი დღეს მას შემდეგ გახდა, რაც ბინის მეპატრონემ თავდაცვის უწყებას მიმართა.
მომხდართან დაკავშირებით გამოძიებას აწარმოებს ქალაქ თბილისის მთავარი სამმართველო და გამოძიების ინტერესებიდან გამომდინარე არ სახელდება საცხოვრებელი ბინის მისამართი და მოქალაქის ვინაობა. ავალიანის ინფორმაციით, გამოძიება დაადგენს, ვის მიერ და რა დროს, რა მიზნით მოხდა იარაღის შეტანა საცხოვრებელ სახლში.
თავდაცვის სამინისტრომ საქართველოს მოქალაქეებს მოუწოდა, მსგავსი ფაქტის არსებობის შემთხვევაში სამართალდამცავ ორგანოებს მიმართონ. ავალიანის განცხადებით, მომხდართან დაკავშირებით ვიდეომასალა გავრცელდება.
