3 დეკემბერი შეზღუდული შესაძლებლობის მქონე პირთა უფლებების დაცვის დღეა. საქართველოს იუსტიციის სამინისტროს საჯარო რეესტრის ეროვნული სააგენტო ერთ-ერთი პირველია სახელმწიფო უწყებებს შორის, რომელმაც შეზღუდული შესაძლებლობების მქონე პირთა დასაქმების სოციალური პროექტი შექმნა და ამით სურვილი გამოხატა საკუთარ სისტემაში შეზღუდული შესაძლებლობების მქონე ადამიანები დაესაქმებინა.
პროექტის განხორციელება სააგენტოში მას შემდეგ დაიწყო, რაც უწყება სრულად გადავიდა ელექტრონულ საქმისწარმოებაზე და შესაძლებელი გახდა სარეგისტრაციო პროცესის დისტანციურად, ინტერნეტის მეშვეობით წარმოება. სწორედ დისტანციური მართვის შესაძლებლობა დაედო საფუძვლად იმ მოქალაქეთა დახმარების, დასაქმების, განვითარებისა და სამსახურებრივ წინსვლაში ხელშეწყობის სურვილს, რომლებიც ყველაზე მეტად საჭიროებენ ამას.
5 წელი სრულდება მას შემდეგ, რაც სააგენტომ შშმ პირთა პირველი ნაკადი დაასაქმა.
ამჟამად საჯარო რეესტრის ეროვნულ სააგენტოში შეზღუდული შესაძლებლობის მქონე 17 პირი მუშაობს. მათ გააჩნიათ სათანადო განათლება, თუმცა მოკლებულნი არიან გადაადგილების უნარს.
საჯარო რეესტრის ეროვნულ სააგენტოში დასაქმებული შეზღუდული შესაძლებლობების მქონე თანამშრომელები სამსახურებრივ მოვალეობებს საკუთარი საცხოვრებელი სახლიდან გაუსვლელად ასრულებენ. სააგენტომ მათ სათანადო სწავლება ჩაუტარა, კომპიუტერული და საოფისე ტექნიკა ბინაში მიუტანა და ადგილზე შეუქმნა ყველა სამუშაო პირობა. თუმცა, სურვილის შემთხვევაში, იუსტიციის სახლების და საჯარო რეესტრის ოფისების ადაპტირებული გარემო (ავტოსადგომი, პანდუსები და სხვ.) მათ საშუალებას აძლევს, დაკისრებული უფლება-მოვალეობები სამსახურში შეასრულონ (თანამშრომლებთან კონტაქტი და ა.შ.).
ამ პროექტით შეზღუდული შესაძლებლობების მქონე პირებს საზოგადოებრივ ცხოვრებაში ჩართვისა და საკუთარი შესაძლებლობების რეალიზაციის საშუალება მიეცათ.
3 დეკემბერი შეზღუდული შესაძლებლობების მქონე პირთა უფლებების დაცვის საერთაშორისო დღედ (International Day of Persons with Disabilities) გაერთიანებული ერების ორგანიზაციის ინიციატივით 1992 წლიდან იქნა დაწესებული. ეს არის თარიღი, რომელიც კიდევ ერთხელ გვახსენებს, რომ უნდა ვიყოთ ტოლერანტულები ჩვენს გარშემო მცხოვრები შეზღუდული შესაძლებლობების მქონე მოქალაქეების მიმართ.
