ხვალ, 1-ელ დეკემბერს, 12:00 საათზე, კულტურის ცენტრ "მუზაში" შიდსთან ბრძოლის დღისადმი მიძღვნილი ღონისძიება გაიმართება. ღონისძიების ფარგლებში დაგეგმილი აქტივობები მოიცავს საგანმანათლებლო კამპანიის -"არჩევანი შენზეა" ფარგლებში მიმდინარე სხვადასხვა კონკურსში გამარჯვებულთა გამოვლენასა და დაჯილდოებას, შიდსის მსოფლიო დღისადმი მიძღვნილი მარათონის "მე ვირჩევ ცხოვრების ჯანსაღ წესს" ორგანიზებას და საგანმანათლებლო ფილმის ჩვენებას. პარალელურად მოეწყობა ცხოვრების ჯანსაღი წესის თემატიკაზე ჩატარებული ფოტოებისა და პოსტერების კონკურსის საუკეთესო ნამუშევრების გამოფენა.
შიდსთან ბრძოლის მსოფლიო დღისადმი მიძღვნილი ღონისძიება, რომელშიც საქართველოს მასშტაბით 300-მდე სკოლის მოსწავლე მიიღებს მონაწილეობას, მიზნად ისახავს ახალგაზრდების ცნობიერების ამაღლებას აივინფექციის შესახებ, საზოგადოებაში შიდსთან ასოცირებული სტიგმის შემცირებას და ცხოვრების ჯანსაღი წესის დამკვიდრების ხელშეწყობას.
ღონისძიებას დაესწრებიან ქვეყნის საკოორდინაციო საბჭოს თავმჯდომარე სანდრა რულოვსი, აშშ ელჩი საქართველოში რიჩარდ ნორლანდი, სპორტის და ახალგაზრდულ საქმეთა მინისტრი ლევან ყიფიანი.
ღონისძიების ორგანიზატორია აშშ საერთაშორისო განვითარების სააგენტოს (UშAID) მიერ დაფინანსებული "საქართველოში აივ პრევენციის პროექტი" და ორგანიზაცია "ახალი თაობა ახალი ინიციატივა".
