განათლების და მეცნიერების სამინისტროში პოლიტიკური ნიშნით დევნილი პედაგოგების საქმეების შემსწავლელი კომისია შეიქმნა , - აღნიშნულის შესახებ უწყებაში გამართულ პრესკონფერენციაზე განათლებისა და მეცნიერების მინისტრმა, გიორგი მარგველაშვილმა განაცხადა და აღნიშნა, რომ კომისიაში განსახილვევლად უკვე 500-მდე განცხადებაა შესული.
"სამინისტროში შემოვიდა ძალიან ბევრი ინფორმაცია, ბევრ ადამიანს რჩება განცდა, რომ ისინი პოლიტიკური ნიშნით არიან დევნილები. აქედან გამომდინარე, სამინისტრომ შექმნა კომისია, რომლის მთავარი მიზანი იქნება, მოიკვლიოს ყველა ასეთი საქმე და შეძლებისდაგვარად მოაგვაროს ეს დავები", - განაცხადა მარგველაშვილმა.
მისივე განცხადებით, კომისიის თავმჯდომარე განათლების და მეცნიერების მინისტრის მოადგილე ალუდა გოგლიჩიძე იქნება.
კომისიის შემადგენლობაში ასევე შედიან სამინისტროს შიდა აუდიტის დეპარტამენტის, იურიდიული დეპარტამენტის წარმომადგენლები. სამინისტროს წევრების გარდა, კომისიის წევრები არიან: "სამართლიანი არჩევნებისა და დემოკრატიის საერთაშორისო საზოგადოება", "საქართველოს ახალგაზრდა იურისტთა ასოციაცია", "ადამიანის უფლებათა პრიორიტეტი", "საერთაშორისო გამჭვირვალობა-საქართველო", "სკოლა, ოჯახი და საზოგადოება", "განათლების, დაგეგმვისა და მართვის საერთაშორუსო ინსტიტუტი", ასევე სახალხო დამცველის ოფისი.