ახმეტის ახალი ხელისუფლების წარმომადგენლებმა სოფელ ზემო ალვანში, სტალინის ძეგლი დააბრუნეს. როგორც კახეთის საინფორმაციო ცენტრს სოფელ ზემო ალვანის რწმუნებულმა დავით ქააძემ განუცხადა, ძეგლი ჯერ შეფუთულია და მისი გახსნა რამდენიმე დღეში იგეგმება.
„გუშინ, დილით რომ გამოვედი სოფელში, დავინახე, რომ სტალინის ძეგლი აღდგენილი იყო, მაგრამ ჯერ შეფუთულია. ჩემთვის არავის არაფერი უთქვამს, საქმის კურსში არ ვიყავი. ვისი ინიციტივა იყო, ვინ აღადგინა არაფერი ვიცი. მე ძეგლის აღდგენის მომხრე ვიყავი. ასეა თუ ისეა, ისტორიაა. მის დემონტაჟს მხარს არ ვუჭერდი. ეს იყო დავალება. ვისი დავალება იყო, არ ვიცი. ღამე მოვიდა მანქანა და ძეგლი მოხსნეს. მე უბრალოდ ვესწრებოდი ამ პროცესს, რომ ძალიან არ დაზიანებულიყო. ძეგლი ამ დრომდე ერთ-ერთ ინდმეწარმესთან ინახებოდა," -აღნიშნა დავით ქააძემ.
ახმეტის საკრებულოს თავმჯდომარის ზაქარია ქინქლაძის თქმით, სტალინის ძეგლის აღდგენის თაობაზე საკრებულო საქმის კურსში არ არის, თუმცა ამ ფაქტს მიესალმება.
„არვიცი მართლა თუ აღადგინეს ძეგლი, მაგრამ თუ ასეა, მევესალმები. ეს ძეგლი იდგა იმ ადგილას, სადაც არის შინმოუსვლელთა მემორიალი, ეს იყო მეორე მსოფლიო ომის სიმბოლო. საქართველოში შინმოუსვლელთა პირველი სტენდი და „ობელისკი" ზემო ალვანში გაკეთდა. შეიძლება ითქვას, რომ ამას ისტორიული დატვირთვა ჰქონდა, თორემ მე სტალინიზმის მომხრე კი არ ვარ. ძეგლის აღდგენის მომხრე ვიყავი არა იმიტომ, რომ ეს არის კოლექტივიზაციასთან და საბჭოთა წყობასთან დაკავშირებული, არამედ იმიტომ, რომ ომთან დაკავშირებულია. როცა აიღეს ძეგლი, ღამე მივიდნენ და სადღაც მაყვლის ბარდებში ჩააგდეს, როგორც იყო ხოლმე," - განუცხადა კახეთის საინფორმაციო ცენტრს ზაქარია ქინქლაძემ.
კახეთის საინფორმაციო ცენტრის ინფორმაციით, ძეგლის აღდგენა ახმეტის გამგეობის მიერ მოხდა. გამგებელი ბექა ბაიდაური, რომელიც ამ თანამდებობაზე რამდენიმე დღის წინ დაინიშნა, კომენტარს არ აკეთებს.
ზემო ალვანში სტალინის ძეგლი 2011 წლის 16 ივნისს, ღამით აიღეს. დემონტაჟი დაახლოებით 1 საათს გაგრძელდა. სტალინის ძეგლის აღების შესახებ ზემო ალვანის მაცხოვრებლები ინფორმირებულები არ იყვნენ. მათ ძეგლის დემონტაჟის შესახებ დილით შეიტყვეს, როცა ძეგლი ადგილზე აღარ დახვდათ. ახმეტის მუნიციპალიტეტის მაშინდელი გამგებელი კობა მაისურაძე და საკრებულოს თავმჯდომარე ალექსანდრე მაილაშვილი აცხადებდნენ, რომ ძეგლის დემონტაჟის შესახებ საქმის კურსში არ იყვნენ.
შეგახსენებთ, 2012 წლის საპარლამენტო არჩევნების შემდეგ ახმეტას ახალი ადგილობრივი ხელისუფლება ჰყავს.