სასჯელაღსრულების დეპარტამენტის ყოფილი თავმჯდომარის დავით ჭაკუასა და ხობის რაიონის კუდ-ის უფროსის დიმიტრი ჭაკუას მშობლების სახლში დაუდგენელი პირები შეიჭრნენ. მათ საცხოვრებელი სახლის ფანჯრები ქვებით ჩაამსხვრიეს.
ოჯახის ახლობლები მომხდარს ოჯახზე ზეწოლისა და დაშინების ფაქტად აფასებენ. ადგილზე იმყოფებოდნენ სამართალდამცველებიც. ფაქტზე აღძრულია სისხლის სამართლის საქმე და მიმდინარეობს გამოძიება.
შეგახსენებთ, რომ ციხის სკანდალის შემდეგ, 2012 წლის 18 სექეტემბერს, სასჯელაღსრულების პრობაციისა და იურიდიული დახმარების საკითხთა მაშინდელმა მინისტრმა ხათუნა კალმახელიძემ დავით ჭაკუა თანამდებობიდან გაათავისუფლა. რმდენიმე დღის წინ მთავარმა პროკურორმა არჩილ კბილაშვილმა განაცხადა, რომ დავით ჭაკუას მიმართ უახლოეს მომავალში სამართლებრივი დევნა დაიწყება. მისი თქმით, 2011 წლის 13 სექტემბერს, ბაჩანა ახალიას დავალებით საცხოვრებელ ბინაში მიაკითხა ბაჩანა ახალიასთან დაახლოებულმა პირმა, რომელმაც დაზარალებულს მოსთხოვა გაყოლოდა თბილისში მდებარე ერთ-ერთ რესტორანში, სადაც მას ელოდებოდა ბაჩანა ახალაია. დაზარალებულს რესტორნის კუპეში მას დახვდნენ - ბაჩანა ახალაია, გიორგი კალანდაძე და სხვა პირები. ადგილზე მისული დაზარალებული ბაჩანა ახალაიას დავალებით გააკავეს მისი დაცვის წევრებმა. ამ დროს მათთან შევიდა დავით ჭაკუა, რომელმაც მას სკამი ჩაარტყა ბეჭის არეში და ხელ-ფეხით დაუწყო ცემა. დაზარალებულის ჩვენების მმიხედვით, მას აიძულეს კუთვნილი ავტომანქანა სასჯელაღსრულების დეპარტამენტისათვის ეჩუქებინა. ამის შემდეგ დაზარალებულს დაარეკვინეს მეუღლესთან, რომელსაც დაზარალებულმა სთხოვა, რომ მიეცა მანქანის გასაღები და გამოეტანებინა მანქანა მისი მეგობრისათვის, რომელიც მიაკითხავდა სახლში. ავტომანქანის მოყვანის შემდეგ ბაჩანა ახალაიამ დავალება მისცა დავით ჭაკუას და გამოძიებით დადგენილ კიდევ ერთ პირს, რომ სპეცრაზის შეიარაღებულ პირებთან ერთად წაეყვანათ დაზარალებული სადმე, სადაც დააბამდნენ და დაამწყვდევდნენ, რაც სისრულეში მოყვანეს.