დღეს, 22 ნოემბერს 17.00 საათზე სავალუტო ფონდის მუდმივი წარმომადგენელ საქართველოში აზიმ სადიკოვი „საპარტნიორო ფონდის" აღმასრულებელ დირექტორს ირაკლი კოვზანაძეს შეხვდება. როგორც სააგენტო „ჯი-ეიჩ-ენს" „საპარტნიორო ფონდიდან" აცნობეს, შეხვედრის მიზანს წარმოადგენსსავალუტო ფონდის მიერ საქართველოში განხორციელებული პროექტების მდგომარეობის სტატუსი, საფინანსო სექტორში არსებული სიტუაცია და ასევე სს „საპარტნიორო ფონდის"
მიერ საქართველოში წამოწყებული პროექტების მიმდინარეობისა და სამომავლო გეგმების განხილვა.
როგორც ცნობილია, საქართველოში ფონდის მუდმივი წარმომადგენელი აზიმ სადიკოვი მიიჩნევს, რომ ფონდის მუშაობა უნდა იყოს გამჭვირვალე. „გამჭვირვალე უნდა იყოს ასევე ფონდის მიერ პროექტების შერჩევის კრიტერიუმებიც" - აცხადებს აზიმ სადიკოვი.
„ახალ მთავრობასთან უნდა განვიხილოთ თუ რას აპირებს ის საპარტნიორო ფონდთან მიმართებაში, რადგანაც ის სერიოზული სახელმწიფო აქტივების მფლობელია"- აცხადებს აზიმ სადიმოვი.
საქართველოში სსფ-ს მუდმივი წარმომადგენელი აცხადებს, რომ საპარტნიორო ფონდის მმართველი საბჭო დამოუკიდებელი უნდა იყოს და დამოუკიდებლად უნდა არსებობდეს.
შეგახსენებთ, რომ საპარტნიორო ფონდი 2010 წელს დაარსდა. ფონდი თავის საქმიანობაში დამოუკიდებელია და საქმიანობის განხორციელებისას ხელმძღვანელობს "მეწარმეთა შესახებ" საქართველოს კანონით, საქართველოს სამოქალაქო კოდექსით, ამ კანონით, ფონდის წესდებით, საქართველოს სხვა საკანონმდებლო და კანონქვემდებარე ნორმატიული აქტებით.
ფონდის მიზნებია: მოგების მიღება და ფინანსური აქტივების ღირებულების გაზრდა; ინვესტიციების მოზიდვა; სამუშაო ადგილების შექმნა; შეფერხებული პროექტების დასრულებისათვის ხელის შეწყობა და ახალი პროექტების შემუშავება ან/და დაფინანსება; განხორციელებულ პროექტებში არსებული თავისი კუთვნილი წილის/აქციების განკარგვა.