სამშენებლო კომპანია NCC-ს გენერალურ დირექტორს, გეგი ქელბაქიანს და ფინანსურ მენეჯერს, არჩილ ჩოგოვაძეს ბრალს, სავარაუდოდ დღეს წაუყენებენ.
დაკავებულ პირებს წარედგინებათ ბრალდება საქართველოს სისხლის სამართლის კოდექსის 194-ე მუხლის მე-3 ნაწილის ა) და გ) პუნქტებით. აღნიშნული დანაშაული ითვალისწინებს 12 წლამდე თავისუფლების აღკვეთას".
ქელბაქიანი და ჩოგოვაძე სამართალდამცველებმა გუშინ ღამით, დაკითხვის შემდეგ დააკავეს. შსს-ის ინფორმაციით, გეგი ქელბაქიანი და არჩილ ჩოგოვაძე უკანონო შემოსავლის ლეგალიზაციის ფაქტზე დააკავეს, რომლებმაც სახელმწიფო სახსრების დიდი ოდენობით მითვისების მიზნით, ერთ-ერთ ფიზიკურ პირს კონტრაქტის გარეშე ჩაურიცხეს 6 309 885 ლარი, საიდანაც აღნიშნულმა პირმა 3 032 091 ლარი ნაღდი ფული, უკან დაუბრუნა გიორგი ქელბაქიანს და არჩილ ჩოგოვაძეს. ასევე, ამავე პირების მიმართ მიმდინარეობს ინტენსიური გამოძიება რიყეზე მდებარე „ბუდაბარის" საკუთრების კანონიერების შესახებ, აგრეთვე თბილისის შემოგარენში მშენებარე ფეშენებელური აგარაკების სამშენებლო სახსრების წარმომავლობასთან დაკავშირებით.