უახლოეს ხანებში საქართველოს ევროპის რეკონსტრუქციისა და განვითარების ბანკის მმართველი დირექტორი, ოლივიე დეშამი ეწვევა. აღნიშნულის შესახებ ფინანსთა მინისტრ ნოდარ ხადურისა და ევროპის რეკონსტრუქციისა და განვითარების ბანკის (EBRD) კავკასიის, მოლდოვისა და ბელორუსის წარმომადგენლობების დირექტორ პოლ-ანრი ფორესტიერის შეხვედრის შემდეგ გახდა ცნობილი.
"20 წელია EBRD-ი მუშაობს საქართველოში. განხორციელებულია მნიშვნელოვანი პროექტები, მათ შორის, ენერგეტიკის, წყალმომარაგების სფეროში, მყარი ნარჩენების მართვის კუთხით. ჩვენ გავაგრძელებთ ამ მიმართულებით თანამშრომლობას. საქართველოს ფინანსთა მინისტრი, იმავდროულად არის EBRD-ში ქვეყნის მმართველი, ამდენად, ვიმსჯელეთ იმ პროქტებზე, რომლის განხორციელებაც იგეგმება მომავალ წლებში. ასევე, ვისაუბრეთ ევროპის რეკონსტრუქციისა და განვითარების ბანკის მმართველი დირექტორის, ოლივიე დეშამის დაგეგმილ ვიზიტზე საქართველოში. ამ მიმართულებით სერიოზულად ვმუშაობთ, რათა შეხვედრების დროს გადაიდგას კონკრეტული ნაბიჯები, რათა ყველა ის ინფრასტრუქტურული პროექტი, რომელიც მნიშვნელოვანია საქართველოსთვის, განხორციელდეს და რაც მთავარია, მაქსიმალური ეფექტი მიიღოს ქვეყანამ", - განაცხადა ფინანსთა მინისტრმა.
"ევროპის რეკონსტრუქციისა და განვითარების ბანკი ამჟამად სამწლიანი სტრატეგიის შემუშავების პროცესშია და, რა თქმა უნდა, ეს გეგმები შეთანხმებული უნდა იყოს ქვეყნის მთავრობასთან. საქართველოში ჩამოდის EBRD-ის მმართველი დირექტორი, რომელიც აღნიშნული სტრატეგიის შემუშავების ფარგლებში შეხვედრას გამართავს ფინანსთა მინისტრთან," - განაცხადა EBRD-ის კავკასიის, მოლდოვისა და ბელორუსის წარმომადგენლობების დირექტორმა.
EBRD-ის მმართველი დირექტორის ვიზიტი საქართველოში მომავალ კვირას შედგება.