აჭარის მთავრობა რეგიონის ბიზნესგაერთიანებებს ინვესტიციების მოზიდვაში დახმარებას სთხოვს. როგორც სააგენტო „ჯი-ეიჩ-ენს" აჭარის სავაჭრო-სამრეწველო პალატაში განუცხადეს, პალატას გაცნობითი ვიზიტით აჭარის ფინანსთა და ეკონომიკის მინისტრი გიორგი თავართქილაძე სტუმრობდა. აღნიშნულ შეხვედრას ესწრებოდნენ აჭარაში მოქმედი ბიზნეს ასოციაციების წარმომადგენლებიც. გიორგი თავართქილაძემ პალატის თანამშრომლებს სამინისტროს ახალი ხედვები და მიმართულებები გააცნო და სთხოვა მათ ჩართული იყვნენ რეგიონის ეკონომიკური განვითარებისა და ახალი საინვესტიციო პროექტების განხორციელებაში სრული მობილიზებით.
"პროფესიონალიზმი, პატრიოტობა, შემოქმედებითი აქტიურობა პალატის ყველა რგოლის მთავარი პრინციპებია, რაც კონკრეტული შედეგებით იქნება წარმოჩენილი", - აღინიშნა შეხვედრაზე.