პრემიერ-მინისტრის გადაწყვეტილებით, შრომითი ურთიერთობებისა და სოციალური დიალოგის საკითხთა დროებითი კომისია იქმნება. კომისიის შექმნის შესახებ მთავრობამ შესაბამისი დადგენილება უკვე მიიღო.
კომისიის შექმნის მიზანი მსხვილ დამსაქმებელსა და დასაქმებულთა შორის შრომითი ურთიერთობებიდან გამომდინარე ბოლო პერიოდში წარმოშობილი პრობლემური საკითხების შესწავლა, შესაბამისი რეკომენდაციებისა და დასკვნების შემუშავება და ასევე მთავრობის მიერ აღნიშნული საკითხების ოპერატიულად გადაწყვეტის ხელშეწყობა იქნება.
კომისიას პრემიერ-მინისტრი ბიძინა ივანიშვილი უხელმძღვანელებს და მისი მოადგილე ეკონომიკისა და მდგრადი განვითარების მინისტრი გიორგი კვირიკაშვილი იქნება. კომისიის შემდგენლობაში ასევე იქნებიან: ხათუნა გოგოლაძე, დავით ნარმანია, კახა საკანდელიძე, დავით სერგეენკო, ირაკლი ღარიბაშვილი, ნოდარ ხადური. კომისიაში მოწვეული წევრის სტატუსით დეპუტატი გია ჟორჟოლიანი იმუშავებს.
