საქართველოს პრეზიდენტმა მიხეილ სააკაშვილმა ეგვიპტის არაბული რესპუბლიკის პრეზიდენტ მოჰამედ მორსის სამძიმრის წერილი გაუგზავნა.
საქართველოს პრეზიდენტის ადმინისტრაციის ინფორმაციით, წერილში მიხეილ სააკაშვილი ასიუთის პროვინციის მანფალუტის რაიონში მომხდარი იმ უბედური შემთხვევის გამო, რომელმაც 50 ადამიანის და უმეტესად ბავშვების სიცოცხლე შეიწირა, სამძიმარს გამოთქვამს.
"ამ ღმა მწუხარების მომენტში მინდა დაგარწმუნოთ, რომ საქართველოს მთავრობა და ხალხი განიცდის ამ უბედურ შემთხვევას იმ ადამიანების ოჯახებთან ერთად, ვინც ამ ტრაგიკულ შემთხვევას შეეწირა. თქვენო ბრწყინვალებავ, გთხოვთ გადასცეთ ჩემი ღრმა მწუხარება დაღუპულთა ოჯახებს და ჩემი პატივისცემა და თანადგომა მიიღოთ", - ნათქვამია მიხეილ სააკაშვილის წერილში.
ეგვიპტეში შემზარავი ტრაგედია 17 ნოემბერს მოხდა. აღნიშნულის გამო ქვეყნის ტრანსპორტის მინისტრი თანამდებობიდან გადადგა.
