სამაუწყებლო კომპანია „რუსთავი 2"-ის 51 პროცენტიანი წილის მფლობელი ტელეკომპანია „საქართველო" გახდა. როგორც სამეწარმეო რეესტრში წარდგენილი დოკუმენტაციიდან ირკვევა 13 ნოემბერს გამართულ პარტნიორთა კრებაზე გადაწყდა, რომ ტელეკომპანია „საქართველო" 51 პროცენტიანი წილის სანაცვლოდ „რუსთავი 2"-ს მის კუთვნილ უძრავ ქონებას მთლიანად გადასცემს.
media.ge-ს ინფორმაციით, ქონებაში როგორც ტექნიკური აპარატურა, ისე ავეჯი შედის, მისი საერთო ღირებულება კი 5 მილიონ 700 ათასი ლარია.
ამჟამად „რუსთავი 2"-ის 9 პროცენტიან წილს მისი დირექტორი გიორგი გეგეშიძე ფლობს, 22 პროცენტს ლევან ყარამანიშვილს, 18 პროცენტი კი გიორგი ყარამანიშვილს ეკუთვნის. გიორგი და ლევან ყარამანიშვილები ფლობენ ტელეკომპანია „საქართველოსაც".
მათ ეს კომპანია მიმდინარე წლის 30 ოქტომბერს მას შემდეგ შეიძინეს, რაც „საქართველოს" კუთვნილი საერთო სიხშირული ლიცენზია ჟურნალ „ტაბულას" გამომცემელმა „მედიის განათლების ფონდმა" იყიდა.
ამის პარალელურად, „რუსთავი 2"-ის დაბრუნება მის ყოფილ მფლობელებს სურთ. ჯარჯი აქიმიძემ და დავით დვალმა განაცხადეს, რომ ისინი სამართლებრივ დავას იწყებენ. ტელეკომპანიის დაბრუნებას ცდილობს ქიბარ ხალვაშიც, ბიზნესმენი, რომელიც რამდენიმე წლის წინ ემიგრაციაში წავიდა და ხელისუფლება დევნაში დაადანაშაულა. ხალვაში „რუსთავი 2"-ს დავით დვალის, ჯარჯი აქიმიძისა და ეროსი კიწმარიშვილის შემდეგ ფლობდა.