საქართველოს იუსტიციის სამინისტროს ეროვნული არქივის გენერალურმა დირექტორმა თეონა იაშვილმა და თბილისის სახელმწიფო უნივერსიტეტის რექტორმა ალექსანდრე კვიტაშვილმა დღეს უწყებებს შორის ურთიერთთანამშრომლობის მემორანდუმზე ხელი მოაწერეს.
მემორანდუმის მიზანია ეროვნული არქივის საქმიანობის შესახებ თსუ-სა და მისი სტუდენტების ინფორმირების პროცესისა და საშუალებების ეფექტიანობის გაზრდა; ერთობლივი პროექტების განხორციელება და ინსტიტუციური მიზნების მიღწევის ხელშეწყობა.
მხარეებმა აღნიშნეს, რომ საქართველოს ეროვნულ არქივსა და თბილისის სახელმწიფო უნივერსიტეტს შორის წლების განმავლობაში ჩამოყალიბებულია მჭირდო თანამშრომლობა, რომელიც უკვე მემორანდუმითაც გამყარდა.
პირველ ეტაპზე თსუ-ს ორგანიზებით შეიქმნება მკვლევარ სტუდენტთა ჯგუფები, რომლებიც ეროვნულ საარქივო ფონდში დაცულ სამართლებრივ დოკუმენტებზე იმუშავებენ და მოამზადებენ სამეცნიერო პუბლიკაციებს.
მემორანდუმის ხელმოწერის შემდეგ ეროვნული არქივის თანამშრომლებმა ანტონ ვაჭარაძემ და ნათია მირიანაშვილმა სტუდენტებისათვის ეროვნულ არქივში დაცულ სამართლებრივ დოკუმენტების შესახებ პრეზენტაცია გამართეს.
