საქართველომ დღეს სურსათის უვნებლობის საერთაშორისო ფორუმს უმასპინძლა, რომელსაც 100-ზე მეტი მონაწილე დაესწრო ევროპიდან და ცენტრალური აზიიდან. მონაწილეებმა განიხილეს სურსათის უვნებლობის თანამედროვე სისტემების როლი კომპანიების კონკურენტუნარიანობის ამაღლებასა და ბაზრის გაფართოებაში.
ფორუმს დაესწრნენ წამყვანი საერთაშორისო, რეგიონული და ადგილობრივი სურსათის მწარმოებელი კომპანიების, საცალო ქსელების, მთავრობის წარმომადგენლები, კონსულტანტები და დარგის ექსპერტები. მონაწილეებმა ერთმანეთს სურსათის უვნებლობის პრაქტიკის გაუმჯობესების სფეროში დაგროვილი გამოცდილება გაუზიარეს. სურსათის უვნებლობის პრაქტიკის გაუმჯობესებას შედეგად გაყიდვების ზრდა და ახალ ბაზრებზე შესვლა მოჰყვება.
`მსგავსი ტიპის შეხვედრები ძალიან მნიშვნელოვანია სურსათის უვნებლობის პრაქტიკის გაუმჯობესების კუთხით. საერთაშორისო გამოცდილების გაზიარება, ვფიქრობ, მნიშვნელოვნად შეუწყობს ხელს საქართველოში სურსათის უვნებლობის სფეროში ეფექტიანი სახელმწიფო ზედამხედველობის დანერგვას.
ჩვენი პრიციპია, ერთის მხრივ, მეწარმეთა ინტერესების დაცვა, მეორეს მხრივ, არ უნდა დაგვავიწყდეს მომხმარებელი, რომელთა უფლებებიც ასევე უნდა იყოს დაცული ქვეყანაში."- განაცხადა სურსათის ეროვნული სააგენტოს უფროსმა ზურაბ ჩეკურაშვილმა.
`სურსათის უვნებლობის პრაქტიკის გაუმჯობესება კომპანიებს ხელს უწყობს რისკების მინიმუმამდე შემცირებაში, ასევე მომხმარებლების ნდობის მოპოვებასა და პოტენციური ინვესტორების მოზიდვაში. IFჩ-ს ამ სფეროში მნიშვნელოვანი გამოცდილება აქვს დაგროვილი როგორც მსოფლიო მასშტაბით, ისე ამ რეგიონში. ჩვენ განვაგრძობთ კომპანიების განვითარების ხელშეწყობას, რაც კიდევ უფრო გააფართოვებს ქვეყნის ეკონომიკური ზრდის შესაძლებლობებს"- განაცხადა IFC -ის საკონსულტაციო პროგრამის ხელმძღვანელმა ევროპასა და ცენტრალურ აზიაში ჯესპერ კიერმა.
სურსათის უვნებლობის საერთაშორისო ფორუმი რეგიონში IFC -ის იმ საქმიანობის ნაწილია, რომელიც აგრობიზნესის პოტენციალის გაუმჯობესებას ისახავს მიზნად. IFC-ის საკონსულტაციო პროგრამა ევროპასა და ცენტრალურ აზიაში მეწარმეებს წარმოების მთელ ჯაჭვში სურსათის უვნებლობის მართვის თანამედროვე სისტემების დანერგვაში ეხმარება.
I IFC ევროპასა და ცენტრალურ აზიაში სურსათის უვნებლობის საერთაშორისო ფორუმს უკვე მეორედ ატარებს. მას ფინანსურ მხარდაჭერას ავსტრიის ფინანსთა სამინისტრო და BP და მისი ნავთობის და გაზის პარტნიორები უწევენ. პირველი ასეთი ფორუმი შარშან კიევში ჩატარდა.