.,,საქართველოს ელჩები საქართველოსთვის მუშაობენ და არა რომელიმე პარტიისთვის", -განაცხადა მიხეილ სააკაშვილმა ბრიუსელში ვიზიტისას, სადაც ჟურნალისტების შეკითხვებს უპასუხა და აღნიშნა, რომ კონკრეტული ადამიანების მოშორება სწორი არ იქნება, იმ საბაბით, რომ ისინი სხვისი დანიშნულები არიან.
პრეზიდენტის განაცხადებით, ელჩებთან დაკავშირებით, გაურკვევლობაა. როგორც ჟურნალისტებთან სააკაშვილმა განაცხადა დიპლომატიური უწყების წარმომადგენლები იცავენ ქვეყნის ინტერესებსა და არა რომელიმე პარტიის ინტერესებს.
,,ვფიქრობ, ბევრი რამ არის გაურკვეველი, მაგალითად, დიპლომატიური წარმომადგენლობის გამოყენების საკითხი. ჩვენი ელჩები სააკაშვილის ელჩები კი არ არიან - ისინი საქართველოს ელჩები არიან, საქართველოსთვის მუშაობენ და არა რომელიმე პარტიისთვის. ამ მხრივ უნდა შევხედოთ მათ და არა იმის მიხედვით თუ ვისი დანიშნულია და ვინმეს ინტერესებს ხომ არ წარმოადგენს. ელჩი არავის ინტერესებს არ უნდა წარმოადგენდეს გარდა ქვეყნისა. ჩვენი ქვეყანა ძალიან პატარაა იმისთვის, რომ აქ გადმოვიტანოთ ჩვენი უთანხმოება და აქ დავიწყოთ ერთმანეთის გმობა", _განაცხადა პრეზიდენტმა, რომელმაც აღნიშნა, რომ მზადაა ახალ ხელისუფლებასთან საგარეო საქმეებსა და თავდაცვის სფეროში ითანამშრომლოს.
,,ჩვენ მზად ვართ, ინტენსიურად ვითანამშრომლოთ უმრავლესობასთან, განსაკუთრებით, საგარეო საქმეებსა და თავდაცვის სფეროში. ჩვენი სურვილია პროგრესის გაგრძელება. არ იქნება სწორი კონკრეტული ადამიანების მოშორება იმ საბაბით, რომ ისინი სხვისი დანიშნულები არიან. მე ვიყავი ახალი პრეზიდენტი და ჩემი წინამორბედის მიერ დანიშნული ძალიან ბევრი ელჩი კიდევ მრავალი წელი მუშაობდა, ზოგიერთი მათგანი ახლაც კი მუშაობს. ეს სახელმწიფო ინსტიტუტების ფუნქციონირების გაგრძელების საკითხია. დიპლომატების გასაზრდელად და დიპლომატიური სკოლის შესაქმნელად, ქვეყნებს ასწლეულები სჭირდება", _განაცხადა პრეზიდენტმა.
მისივე გნაცხადებით, ხალხის დევნა არ შეიძლება მხოლოდ იმიტომ, რომ სხვისი დანიშნულია, თუმცა სახელმწიფოს ინტერესებს ემსახურება.
,,ჩვენ ძალიან სწრაფად მოგვიწია ამის გაკეთება და საუკეთესო კადრები გვყავს. ეს ხალხი საქართველოს ემსახურება და არა რომელიმე პარტიას. ჩვენ ვარდების რევოლუციის შემდეგაც არ შეგვიხედავს მათთვის პარტიული ნიშნით. პრაქტიკულად, ჩვენ ნანგრევები დაგვხვდა, მაგრამ ზოგი რამ მაშინაც არ იყო გადასაგდები. ახლა მით უმეტეს - როდესაც სახელმწიფო ავაშენეთ, როგორ შეიძლება ჩაქუჩით მივადგეთ მას და ხალხი დევნო იმისთვის, რომ სახელმწიფოს ემსახურებოდნენ", _განაცხადა მიხეილ სააკაშვილმა.