ივანე ჯავახიშვილის სახელობის თბილისის სახელმწიფო უნივერსიტეტის პოლიტიკური ნიშნით დევნილ და უსამართლოდ გათავისუფლებულ პროფესორთა უფლებების დაცვის საინიციატივო ჯგუფი, რომლის შემადგენლობაშიც შედიან თსუ-ს ყოფილი პროფესორები: ხათუნა ჩარკვიანი, ლელა გაფრინდაშვილი, თამარ კიკნაძე, გიორგი ყიფიანი, ნინო გვენეტაძე, მერაბ ტურავა, გოჩა მამულაშვილი, მარიამ ცაცანაშვილი, მაკა კვაჭაძე, ერეკლე ასტახიშვილი, ეკა ჩოხელი, ნინო მიქიაშვილი, რუსუდან სეთურიძე, ასევე სტუდენტური მოძრაობის წარმომადგენლები ლევან ლორთქიფანიძე და სანდრო ცაგარელი, დღეს საგანგებო განცხადებით მიმართავენ საქართველოს განათლებისა და მეცნიერების მინისტრს გიორგი მარგველაშვილს, და მიაწვდიან მას ოფიციალურ ინფორმაციას საინიციატივო ჯგუფის განცხადებაზე თსუ-ს რექტორატის საპასუხო წერილთან დაკავშირებით.
კერძოდ, ამა წლის 1 ნოემბერს საინიციატივო ჯგუფმა განცხადებით მიმართა თსუ-ს რექტორს ალექსანდრე კვიტაშვილის და მოითხოვა შეხვედრა განათლების მინისტრის 30 ოქტომბრის მიმართვის საფუძველზე, სადაც მინისტრი მოუწოდებს მხარეებს, რომ უახლოეს 2-3 კვირაში მოხდეს ყველა შესაძლებლობის გამოყენება და საერთო ენის გამონახვა, რათა დაიწყოს თანამშრომლობა და საგანმანათლებლო დაწესებულებებში არსებულმა დავებმა არ გადაინაცვლოს სასამართლო უწყებაში. რექტორატიდან მიღებულ წერილში, რომელსაც ხელს აწერს იურიდიული დეპარტამენტის უფროსი არჩილ კუკულავა, აღნიშნულია, რომ ,,აკადემიური თანამდებობის დაკავებაზე თითოეულ კონკურსანტთან დაკავშირებით, უნივერსიტეტის მიერ მიღებული გადაწყვეტილებები (მათ შორის, უარყოფითი) სამართლებრივად საფუძველდებული და დასაბუთებულია, რაც მათ პოლიტიკურ დატვირთვას გამორიცხავს. და რომ ყოველივე ზემოაღნიშნულიდან გამომდინარე, უნივერსიტეტი ვერ ხედავს რაიმე სახის კომისიის შექმნის აუცილებლობას. ხოლო რაც შეეხება უნივერსიტეტში მიმდინარე პროცესების კონტროლის მექანიზმს, რექტორატი მიიჩნევს, რომ კანონმდებლობის მიხედვით საქართველოს განათლებისა და მეცნიერების სამინისტროს, რომელსაც ხელმძღვანელობს მინისტრი, ჰქონდა და აქვს უნივერსიტეტზე კონტროლის განხორციელების უფლებამოსილებაც და შესაბამისი მექანიზმებიც, რის გამოც უნივერსიტეტი კანონმდებლობით გაუთვალისწინებელი რაიმე სხვა მექანიზმების შექმნისაგან თავის შეკავებას ამჯობინებს."
ყოფილ პროფესორთა საინიციატივო ჯგუფი აღნიშნულ პასუხს აფასებს, როგორ რექტორისა და რექტორატის მხრიდან განათლების მინისტრის მოწოდების უგულებელყოფისა და კონსტრუქციული გადაწყვეტილების მიღებისაგან თავის არიდების მცდელობად, რითაც მტკიცდება, რომ თსუ-ს რექტორატი არ არის დაინტერესებული არსებული პრობლემების მოგვარებით და აგრძელებს ხისტი და უსამართლო პოლიტიკის გატარებას უფლებადარღვეული პროფესორების მიმართ. საინიციატივო ჯგუფი იმედოვნებს, რომ განათლებისა და მეცნიერების მინისტრი უახლოეს პერიოდში შეხვდება თბილისის სახელმწიფო უნივერსიტეტის პოლიტიკური ნიშნით დევნილ და უსამართლოდ გათავისუფლებულ პროფესორთა უფლებების დაცვის საინიციატივო ჯგუფის წევრებს, სადაც განიხილება შემდგომი მოქმედებების გეგმა და კონკრეტული ღონისძიებები.
