ახალი მთავრობისთვის საჰაერო თავდაცვის სისტემები ერთ-ერთი მთავარი პრიორიტეტი იქნება, - ამის შესახებ განცხადება თავდაცვის მინისტრობის კანდიდატმა ირაკლი ალასანიამ დღეს, პარლამენტში, კომიტეტის სხდომაზე გააკეთა.
მისი თქმით, აუცილებელია ქვეყანას საჰაერო სისტემა ჰქონდეს.
"ყურადღება უნდა იყოს გამახვილებული შეიარაღებული ძალების მხრიდან კონტრტერორისტული ღონისძიებების ჩასატარებლად. ჩვენი თანამონაწილეობა საერთაშორისო ოპერაციებში, როგორც ავღანეთის მისიაში, ისევე ნატოს ეგიდით მიმდინარე ოპერაციებში გაგრძელდება. ვფიქრობთ, რომ ეს კიდევ უფრო მეტ პროფესიონალიზმს აძლევს სამხედროებს, კიდევ უფრო ამყარებს ჩვენს თავდაცვის უნარიანობას. ბუნებრივია მისია, რომელიც აიღო ჩვენმა მხარემ ბოლომდე იქნება ქვეყნის მიერ შესრულებული და ამის შემდეგ დავიწყებთ ფიქრს, თუ როდის დაუბრუნდებიან ჩვენი ბიჭები სამშობლოს",- განაცხადა ალასანიამ.