"საქართველოს ხალხთან მეგობრობა, თანამშრომლობა და პარტნიორობა ჩემთვის ბევრს ნიშნავს" , - ამის შესახებ განაცხადა ამერიკელმა სენატორმა, რიჩარდ ლუგარმა მიხეილ სააკაშვილთან ერთობლივად გამართულ პრესკონფერენციაზე.
ამერიკელმა სენატორმა მადლობა გადაუხადა საქართველოს პრეზიდენტს იმისათვის, რომ საზოგადოებრივი ჯანდაცვის ცენტრალურ საცნობარო ლაბორატორიას მისი სახელი მიენიჭა.
"მადლობას ვუხდი ჩვენს მასპიძლებს ამ მშვენიერი შესაძლებლობისთის. მე ბევრჯერ ვიყავი თბილისში მათ შორის 2008 წელსაც ამ შენობის საფიძვლის ჩაყრაზე, მაგრამ ეს ვიზიტი ჩემთვის ძალიან განსაკუთრებულია. ჩემთვის დიდი პატივია, რომ ეს შენობა იქნება რიჩარდ ლუგარის სახელობის ცენტრი საზოგადოებრივი ჯანდაცვის კვლევების და ჩემთვის ბევრს ნიშნავს თქვენი კომენტარი, თქვენი მეგობრობა, თანამშრომლობა და პარტიორობა საქართველოს ხალხთან", - განაცხადა ლუგარმა.
მისი თქმით, საბჭოთა კავშირის დაშლის შემდეგ ისტორიაში დადგა ცვლილებების და რისკების უპრეცენდენტო ერა.
"ჩვენ ვმუშაობდით, რომ გაგვენადგურებინა საბჭოთა კავშირის დროს არსებული ბირთვული და ქიმიური იარაღების მარაგი. ჩვენ ვიცით, რომ არსებული პათოგენები წარმოადგენენ დიდ საფრთხეს როგორც ჩვენი ცხოვრებისთვის, ისე პირუტყვისთვის. იმედს გამოვთქვამთ, რომ საქართველოს ევროპული ცენტრები დაგვეხმარება მივაღწიოთ ამ კუთხით სრულყოფას და გავაუმჯობესოთ თანამშრომლობა მომავალ წლებში. ლუგარის პროგრამა არის საშუალება მივაღწიოთ ერთობლივ მიზნებს - ხელი შევუშალოთ და თავიდან ავიცილოთ დაავადებებიც. ლუგარის სახელობის ცენტრი წარმოადგენს მთავარ კავშირს აშშ-სა და საქართველოს შორის", - აღნიშნა ლუგარმა.
მისივე შეფასებით, ამ ახალ ლაბორატორიას აქვს პოტენციალი გახდეს რეგიონალური ცენტრი ზედამხედველობის, კვლევის, ბიოუსაფრთხოების და უსაფრთხოების სფეროებში.