საქართველოში ვიზიტით მყოფი ამერიკელი სენატორი, რიჩარდ ლუგარი ოპოზიციის წარმომადგენლებს ხვდება . დახურული შეხვედრა სასტუმრო "თბილისი მარიოტში" მიმდინარეობს. პროტოკოლის მიხედვით ის დაახლოებით 40 წუთს გასტანს.
სენატორთან შეხვედრაზე იმყოფებიან კოალიცია "ქართული ოცნების" წევრები, "რესპუბლიკური პარტიის" ლიდერი, დავით უსუფაშვილი, "თავისუფალი დემოკრატების" ლიდერი ირაკლი ალასანია და თედო ჯაფარიძე, ასევე "ქრისტიან-დემოკრატების" თავმჯდომარე გიორგი თარგამაძე.
ოპოზიციასთან შეხვედრის დასრულების შემდეგ რიჩარდ ლუგარი ამერიკის თავდაცვის მდივნის თანაშემწესთან, ენდრიუ ვებერთან ერთად მონაწილეობას მიიღებს ჯანდაცვის ცენტრალური საცნობარო ლაბორატორიისთვის სახელის მინიჭების ცერემონიაში. რიჩარდ ლუგარის ვიზიტი საქართველოში დღეს დაიწყო. ვიზიტის ფარგლებში საზოგადოებრივი ჯანდაცვის ცენტრალური საცნობარო ლაბორატორიის გახსნის გარდა, იგეგმება სტუმრების მონაწილეობა დაავადებათა კონტროლის ეროვნული ცენტრის ადმინისტრაციული შენობის საძირკვლის ჩაყრის ცერემონიაში.